I yap ki bru nei oor khyndaw wa i chlai um ha Darjeeling District ka West Bengal da kynjoh i cha ka 24 ngut, katwa i thooh wei wow pynlait ya kiwi dang pteiñ i heiwa da ki hajar ngut kiwa uiñke suwari dang sahkut kut ki ha kiwa boon ki thaw, da ong ki heh sorkar katai ka jylla ynne ka sngi.
U North Bengal Development Minister, u Udayan Guha da ong u wa i yap kiwa boon toh nei oor khyndaw ynnin ka sngi wei dang em leh ki bru kiwa dang wiar, deiwa pynrap wa i pteiñ u slap da pynchitom i wow thooh ya kiwa dang wiar.
U slap wa joor uwa da hiar hadooh 300 mm du hapoh ki 12 kynta da ktah joor bha u ya kini ki thaaiñ ri-loom ka West Bengal heiwa ki thaw wa da chah ktah joor bha toh ka Mirik, Sukhiapokhri wa Jorebunglow hapoh ka Darjeeling District wa ka Nagrakata ha Jalpaiguri.
Ki chipai ka National Disaster Response Force (NDRF) dang pteiñ ki wow thooh ya kiwa dang wiar kamjooh wow yarap ya kiwa emkaam ha kiwa boon ki thaw.
Neiliang ka Chief Minister, ka Mamata Banerjee daw lai pait ko ya ki thaw wa chah ktah myntu ka sngi.
Da pynkhreh leh ya ki thaw rieh chipor namo ki Relief Camp da ki bor District deiwa krehlang wa ka Gorkhaland Territorial Administration (GTA) wa ki seiñ kreh monsñiawbha heiwa da booh leh ya ki baam, ki kymmor, dawai wa kiwi ya kiwa da chah ktah.
Ki heh ka GTA da ong ki wa ki sarok cha ki kattu katni ki chnong khian da tkut ki la 24 kynta neidaw i oor khyndaw, i oor ki yingkieñ, i ngam ki sarok wa kiwi wei da hap pynemkaam ya ki Helicopter wow lai cha kini ki chnong.
Da ki spah ngut ki Tourist kiwa laike cheini nei yoh chuti Durga Puja da sahkut ki wei dang thooh laad wow pynpoi ya ki cha Siliguri.
Ka India Meteorological Department (IMD) da pyntip ko leh wa u slap daw joor u hadooh mynstep ka 7 tarik ha Darjeeling, Kalimpong, Jalpaiguri wa Cooch Behar District.
Ini i oor khyndaw nei joor slap da wanrah i yei yap ym du ha West Bengal tangwa wot ha Nepal leh heiwa da em palat 37 ngut kiwa yap wei dang boon kiwa wiar.
Discussion about this post