Jowai: Ka khlam u COVID-19 uwa da ktah ya waroh kiwi ki ri wa em ha pyrthai da ktah joor ko leh ka ka ri Bangladesh kawa yabi u pood wa ka jylla Meghalaya.
Katkam wa man katni kiwa yoh ya u COVID-19 hapoh Bangladesh waroh da em ki 65,769; kiwa da chait (recovered) em ki 13,903 ngut katwa kiwa da khlaad em ki 888 ngut hadooh ynnin ka sngi.
Katkam ka yutip wa da yoh, hapoh chnong Jaiñtiapur kiwa da yoh ya uni u khñiang em ki 59 ngut, kiwa dang em ya uni u khñiang namo active cases em ki 49 ngut, kiwa da chait em ki 2 ngut wei da khlaad leh uwi na uni u khñiang.
Ya ka Jaiñtiapur kawa em hapoh ka Sylhet Division da pynhaap hapoh ka Orange Zone.
Chooh chooh ka sorkar Bangladesh da pynlait ko yei khang chnong namo ka Lockdown ha waroh kawi ka ri wei ini i pynlait da pynkhuslai i ya kiwa boon ki paidbah khamtam hadien uwi na ki montri ka sorkar u Bir Bahadur Ushwe Sing, uwa man u Chittagong Hill Tracts Affairs Minister da pyntikna ynne wa yoh u ya uni u khñiang.