15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

La chi bnai da neh i khooid ka Iawmusiang. Dang man i sdang donhi, ong ka Dorbar Chnong Tympang

Advertisement ad1
Advertisement ad1

Jowai: Ka Dorbar Chnong Tympang Iawmusiang Jowai, nadooh ka 30 tarik u Naiynru da sdang ko yaka thong wow wanrah yei khooid i suba hapoh ka chnong khamtam haki bynta wa man yaw, deiwa khut yei ya krehlang ki paidbah nadooh kiwa chongdai, kiwa wan yaw, kiwa yah kari wa kiwi yow ya pynkhooid yaw kamjooh ha waroh soodong ka chnong nalor i pynsñiawthooh hajrong i emkaam wow pynman yaka Iawmusiang kawa khooid, wei ini i lai luti ka Dorbar Chnong Tympang Iawmusiang da kynjoh ko la chi bnai pura kattu.

Ha kini ki chi bnai da yoo sakhiat yei kylla dur ka Chnong Tympang Iawmusiang lada nujor wa ki por nachwa hawa kyruiñ cha ki luti lai kjat ki sarok neibhah wa i pyrchang ka Tympang Iawmusiang wow wanrah yei khooid i suba da sdang ki wow psiah hei thij i pyrkhat ki paidbah wa kynthup nadooh kiwa chong yaw, kiwa wan yaw, kiwa yah kari wa kiwi. 

Advertisement ad1
Advertisement ad1

Kamtæ heiyatoh wa ini da yohlaad u yaklam wa ki bor pynlai kani ka chnong yow tip wa hadooh katwon i chah tynjooh ki yow poi chaka thong i angnood wow pynman yaka chnong kawa khooid wa suba khamtam haki bynta wa man yaw. 

Neiliang u waheh chnong u E. Shylla khana u, “I tynjooh ya i man i kawa eh bha hadooh kattæ kattæ neibhah nachwa wot nadooh ki bor District, ka District Council, ka Municipal waki seiñ wa boonjait da pyrchang ki u pait u yoo ya kani ka Iawmusiang kawa man i dur ka Ri-loom Jaiñtia yow man kawa khooid, wot neiliang yong i leh da jooh pyrchang hi i tangwa boonsien oor, haap i.” 

“Kamtæ ha kini ki chi bnai wa da lai wym ong i wa ini toh du i kreh chitom yong i kam ka chnong ka thaw tangwa toh i yoh yei ya krehlang na waroh ki liang, wei sa iwi leh wa ki bru leh katni da yoo da sñiawthooh ki yei emkaam i khooid i jngiar khamtam nawa wan uni u khñiang COVID-19, da kylla i man i long ki bru, kani man haroh ko ka dak yow yoh yei khooid i jngiar wa i chait i khiah,”da ong u E. Shylla hawa yaklam wa u Wyrta.

Nalor wa u E. Shylla e khublei u yaki paidbah yei ya krehlang yong ki ha kini ki chi bnai wada lai, e khublei haroh u yaka Seiñraij Jowai, neibhah hadien wa ka chnong Tympang Iawmusiang pynbna ko wow khang noh yei chongdai madan kam haki luti lai kjat, ki rood sarok, lada khlem i e thaw ka Seiñraij ym man iwa suk yaki wow leh yeini. Kamtæ lyngba i e thaw ka Seiñraij kitu kiwa im jakpoh neiwa chnongdai da yoh laad biang ki.

Khana haroh u wa ini i yaleh yong ki wym pu man kawa kut, dang man i sdang donhi, katwa toh ka kaam wow yakhun cha madan (Field Work), hanla kattæ leh neiliang ka chnong u ye ki yeini deiwa rai kut nadooh kiwa kitkaam chnong waki paaid wa chong chnong.

Heiyatoh wa kani ka thong neiliang ki bor pynlai chnong ka Iawmusiang hap ki wow yachong pyrkhat neipor cheipor, wei man ka sngi nadooh 10 waje i step hadooh 4 waje i janmiet, ki Volunter ka chnong hap ki wow uiñ sonteri yaki soodong sookun ka chnong khnang yow ye u pyntikna wa i khooid i suba u pteiñ ki chakhmat, neitæ won nadooh 5 waje chaneiñ, ki dkhot yong ka chnong deilang wa kiwa ksohkaam leh ya chimbynta lang ki heini i lai uiñ sonteri. 

Chooh chooh u Waheh Chnong ong u wa hawa sdang, ka chnong wym yohsa ko wow pynemkaam yow dieñ sympat katkam ka aiñ chnong ya kiwa leh pyrchah, tangwa hadien kattu katni tayaw utæ u dieñ sympat man u kam i sneiñ i kyntu ya kiwa boon wa lang wow ya krehlang ki chirup.

Heijooh i por dei mynsien wa sñiawkhian khut chooh chooh u yaki seiñ waphær waphær, yaki paidbah wa wan ha kani ka yaw wow em ki i mynsien ya krehlang, hei wow dam ki u noh taroi yei jhep, u mynthu, u lai mihlait kat chawa yoh neibhah da em ki Public Toilet, da em ki thaw noh jhep wada booh neibynta kiwa lai wa wan, katwa ya kiwa chongdai won u noh ki ya i jhep haki kari Municipal kawa da poi bait kamwa da ya pynbait.

Yooluti u wa lyngba i yoh yei ya krehlang na waroh ki liang, i thong i angnood wow pynman yaka chnong Tympang Iawmusiang Jowai kawa khooid u man i iwa jop.

Share this:
Previous

COVID-19: Palat 50 hajar kiwa chait haka chi sngi, waroh da tam 11 lak kiwa da chait ha India

Next

Yoh COVID-19 u montri ki kaam pohyung ka ri, u Amit Shah