Jowai : Ka Mawryngkneng Higher Secondary School da leh kmen ko yei dap 50 snem namo ka Golden Jubilee ynne ka sngi iwa pynman ha pchem ka skur wei da wan u Dr. Mukul M Sangma kam u kongsan hei emlang u David A Nongrum, MLA, Mawryngkneng kam u symbood kongsan, u Julius Dorphang, MLA, Mawhati wa u MDC Sohryngkhnam, u Pyniaidsing Syiem.
U Dr Mukul M Sangma hei klam yong oo da yaroh u ya ka skur wa da poi ko cha uni u moomær wa 50 kamjooh leh yei e sikai ko ya ki paaid ka chnong wei yeini da ye u pynman sakhiat du nei kreh dohyap kiwa seiñ ya ka skur wa ye ki u pyrkhat jngai.
Da ong chooh chooh u wa ki skur wa miat wa bha dooh toh kiwa pyllai hi da ka chnong kamwa da pynsakhiat ynne ka sngi.
Da pynkut u deiwa ong wa i kitkhlieh toh yong i waroh wow pynkhreh ya ki khynnah yow ye ki u yein wow yaleh ya kiwa boon ki eh wa em ha ka pyrthai wa katni deiwa e ya i stad wa paka dooh. Ka sorkar iwa ha khmat dooh i thong yong ka toh wow pynbiang yei chait i khaih, i puræ puthi wei wow kyntu yei sap yong ki khynnah khynroo ka jylla.
Ka Mawryngkhneng toh ka chnong kawa em ha sarok Shillong-Jowai Road næ u National Highway 44 wei haap ko hapoh ka Hima Khyrim.
Kat hadooh u snem 1966, boon kiwa chong chnong man ki ki wym em u puræ næ tip u thoh wei ha ka 5 Thohlakhmi (February) 1966 da seiñ ya ka Mawryngkneng Proceeding High School. Kani ka skur katni kawa man leh ka Higher Secondary em ko 783 ngut ki khynnah.
Ynne ka sngi da pyllait leh ya ka Golden Jubilee Monument wa ka Golden Jubilee Souvenir wei da pynkup burom leh ya kiwa seiñ ya ka skur, ki president warim ka Managing Committee, ki principal wa kiwi kiwi.
Ynne ka sngi da yoh leh u sakhi ya ki chaad, ki rwai wa kiwi kiwi ki kaam pynwyrngia na ki khynnah ka skur.
Discussion about this post