Hadien wa lai kynreh yei thaw wa em ha Lum Survey ha kylla ka Them Ïewmawlong, ka Hynniewtrep Youth Council (HYC) ynne ka sngi da lai ko wow e dei thoh ha u Symbood Montri Rangbah, u Prestone Tynsong wow leh yeiwa emkaam yaki bru wa sah pyrchah aiñ ha katai ka thaw.
U Roykupar Synrem uwa man u President ka HYC, da ong u wa ka seiñ da yaklam ko yei em ki bru kiwa buhai chnong pyrchah aiñ ha Lum Survey, wei kini ki bru wa sah ha katai ka thaw toh ki wym ye u chaniah wei da mih chiboon ki kaam wa sih na katai ka thaw.
Ha kani ka yalang da emlang u Deputy Commissioner ka East Khasi Hills, wei neiliang uwa yahkhmat ka HYC da khana u wa neiliang u Symbood Montri Rangbah da phah u ya u DC wow khut smat yaka yalang mynstep ka sngi wa ki chnat waphær waphær.
U Roykupar da ong u wa seiñ da dawa ko naka sorkar wow leh dei kaam wei ka seiñ daw yang ko kattu katni por hajrong i dawa wei da pynrap wa lada ka sorkar ym smat ko u leh iyi iyi neiliang ka seiñ ym yohsa ko u leh dei kaam.
Discussion about this post