U Symbood Montri Rangbah uwa man leh u Chairman ka Regional Committee wa pynbait pood ha Ri-Bhoi District, u Prestone Tynsong da ong u wa lada ki paidbah sñiawkhia yei dooh ya ka nan dakha kawa ym em wot 25,000 Sq/ft, kammon u pynbait yei eh.
Da ong u wa ka Regional Committee da dep ko wow lai pait lut ya ki thaw hachwa wow soi ya ka soskular MoU, tangwa ye u man wa em i sñiawthooh bakla yong ki paidbah, wei da ong u wa lada ym ye wow leh katni, ini i eh boi ym ye de u pynbait hadien 50 snem leh.
Da ong wa i wym hun wa i pyrshah ym toh du ha Meghalaya, tangwa wot cha Assam, kamtæ da kyrpaad u ya kitu waroh kiwa embynta wow pdiang yei sakhiat neibhah lada ym ye wow pdiang katni, ini i eh ym kut de i.
Ha iwi i liang, u Symbood Montri Rangbah da ong u wa ka bynta kawa ar yong i pynbait pood ya ki 6 tylli ki thaw wa dang sah daw man ko kawa rap eh wei rap chitom neibhah em ki thaw wa kynthup ya ka Langpih, Block I wa Block II, Psiar wa Khanduli tangwa da ong u wa lada ki paidbah na waroh ar jylla burom ki yei rai wa chim da ki ar sorkar daw ye wow lait na ini i eh.
