U Symbood Montri Rangbah ka jylla uwa pait leh ya ka chnat Bordiñ, u Prestone Tynsong da ong u wa ka jylla hap su ko hadooh T. 120 klur chi snem neiwa soi ya ka Power Purchase Agreement (PPA) wa ka NTPC ha u snem 2007 wow chim ya ka bordiñ kawa hadooh 87 MW.
Da ong u wa neidaw wa sy’at ware ka bai bordiñ ha ka chi Unit, ka sorkar jylla nadooh u snem 2015-16 ym em de u chim bordiñ ko na ka NTPC, tangwa hap su bait ko ya ka ‘Fix Charge’ kawa man T. 120 klur chi snem.
U Symbood Montri Rangbah da e burom u leh ya ka sorkar India wa da pynmih ko ya ka hukum na ka Power Ministry wow pynlait noh hadooh 53 MW na ka jylla wow e cha ka sorkar Tamil Nadu neibynta 5 snem, da ong u wa ya ini da ye wow pyndooh toh nei chimkhia ka North Eastern Regional Power Committee, heiwa sa kamwa 34 MW ka sorkar Meghalaya dang yaklam ko wa ka sorkar pyrdi wow pynlait noh naka jylla.
Da ong u leh wa ka North Eastern Regional Power Committee (NERPC) toh ka dhab ki Montri ka chnat Bordiñ ki jylla ka thaaiñ mihsngi (North East), wei lyngba kani ka dhab ki Montri ye ki wow pynbor ya ka sorkar India wow pynlait ya ka Meghalaya nei wow su mynkna cha ka NTPC khlem da pynemkaam yei bordiñ yong ka.
