Ynne ka sngi ka Jaiñtia Coordiantion Committee for Reservation Policy (JCCRP) da pynman ko ya ka yakhih ha Khliehriat wow dawa sylli namo wow Review ya ka Reservation Policy.
Ha kani ka yakhih neiliang u Waheh Chnong ka Narwan, u Lamsuk Langstang da yaroh u ya u MLA ka VPP u Ardent Basaiawmoit uwa da yieñ wow chah thngan wow dawa na ka sorkar wow sylli biang ya ka Reservation Policy iwa ktah ya ki khon Ynñiaw Trep Ynñiaw Skum.
Da sñiawsih da dooh kyrmen u leh wow yoo wa ha East Jaiñtia kawa em da ki lak ngut kiwa chong chnong tangwa manda poi hei por yakhih ym em wa wan tang da ki spah ngut leh wei ha kam kini ki por iwa pynsarom ko ya kiwa yahkhmat kiwa yakhih neibhah boi boon kopsar ym pu sñiawthooh ki kayi katæ ka Reservation Policy, iyi myntoi wei doohnong na ka deiwa kyrpaad ya ki wow mih ki chaphrang khnang wow yoh mynsien kiwa em chaphrang.
U Lamsul da kynmoo u leh wa ha u snem 2006 heipor wa lai u cha thaaiñ Karbi du ha ka yalang Peace Rally da em da ki lak ngut kiwa mih chaphrang hanla ki Karbi dang man ki jaitbru wa dang duna paaid deiwa kynmoo leh i yakhih ha u 2004-05 wa em ka yakhih neibynta ka MBOSE ha Madan Student ha Shillong heiwa da em du ki phaw hajar ngut kiwa embynta wei lada man bait i kamni ka pateiñ wow wan daw dooh ki ya i kyrmen.
Da kyntu u leh wow dam chwa u dawa ya jar jiar ki bhah tangwa wow kyrchaan ya u Ardent wow pynkylla ya ka Reservation Policy kawa da noh chiliang.
Heijooh i por da ong u wa emkaam wow dawa kawi chwa dep tæ pyrkhat won yeiwa daw bood.
Chooh chooh da kyntu u leh ya ki 7 Yuspong wow mylliñ noh ya ka Party yong ki wow klam ya i yap i im ka jaitbru.
