U Symbood Montri Rangbah ka jylla u Prestone Tynsong da kyntait u wa ki paidbah pyrshah lut ki waroh ya ka Shree Cement Pvt Ltd, wei da kam u wa boon bha kiwa kyrchaan ya ka Shree Cement.
Hawa klam ynne ka sngi, u Prestone da ong u wa lada puræ du ya ka kawi ka sla nyngkong, u yoo du kiwa pyrchah tangwa lada puræ sa kawi ka sla kawa ar, daw yoo ya ki paidbah wa kyrchaan na katai hi ka thaw yow booh Cement Plant ha East Jaiñtia.
Ini i klam u Prestone toh katwa dang yakhih dang lai ko ha ka thaaiñ Shnongrim, East Jaiñtia Hills yow pyrchah yei thmu ka Meghalaya State Pollution Control Board wow pynman ya ka Public Hearing ha ka 31 tarik.
Da ong u ka Public Hearing toh kawa emkaam bha neibhah wa toh lyngba kani daw yoh ki paidbah wow pynsñiaw yow tip ya kiwa pyrchah wa kiwa kyrchaan wa ki phang kiwa yatoh wa ka mariang.
Da ong u leh wa ki phang kiwa yatoh wa ka mariang, da haap ko ha ki aiñ ka sorkar India kiwa pynrkhiñ bha wei ym ye wow leh thok kammon kammon leh.
Ym du itæ, ki paidbah wa kyrchaan ya ka Shree Cement toh yow pynku yei yoh i kot, ka kamai kajih wa i e myntoi chiboon ya ki paidbah wa kiwi ki kaam pynroi leh.
Da ong u wa da phah ya u SP wa DC ka East Jaiñtia wow pynkrehkaam deiwa pynrkhiñ bha ya ka aiñ yow pynlai bait ya ka Public Hearing.
Discussion about this post