Lada pyrchah bait ya ki kaam pynroi daw man ko i dooh nong ya ka Meghalaya: NPYF EJHD Unit

Ka National People’s Youth Front (NPYF), East Jaiñtia Hills District Unit, da sñiawkhia ko yei yakhih chah thngan wa da pynman da ka Green Tech Foundation yow pyrchah yei thmu wow chna ya ka Taj Resort & Spa ha Umiam.

Heijooh i por ka NPYF da ong ko wa burom ko yei hok yong uwi pa uwi ha ka synchaar paidbah wow pynsñiaw ki yeiwa kwah wa sñiawkhia ki, tangwa ini i pyrchah ma pyrchah hawa wanrah ki kaam pynroi wa rap heh deiwa pynman yakhih wei chah thngan daw phah ko ya ka khubor wa sih cha kitu kiwa kwah wow seiñ khih wei daw pynsuki ko yei roi i paar hapoh Meghalaya.

Da ong leh wa ha kini ki por wa joor bha ka yakob wow khriñ ya kiwa uiñke suwari da kiwa boon ki jylla deiwa wanrah ki kaam wa boon jait, ka Meghalaya ymtoh u dooh ko ya kini ki kabu wa daw pynmyntoi ya ki paidbah khamtam ki khynroo khyllood.

Kani ka Taj Resort & Spa ha Umiam man ko u moomær wow pynkylla dur ya ki kaam uiñke suwari hapoh Meghalaya neibhah deiwa em dei naam i pyrtuid ka Taj hapoh ka jylla daw yarap ko wow booh yei pyrtuid ka Meghalaya ha ka International Tourism Map deiwa wan ki bru wa ye u pynlut chiboon iwa daw pynkhlan chooh chooh ya iwa emkaam yow pynku ya ki kaam Tourism.

Related posts

Ka Computer kawa man kam ka Compulsory Subject tangwa ym em biang ki kor ha ki UP School ka Jaiñtia Hills

April 19, 2026

Yap ngam-um u bru na Shillong ha Ri-Bhoi District

April 19, 2026

Chooh chooh da ong wa kini ki jait Project toh kiwa daw pynyoh kreh ya ki khynroo ka Meghalaya ha kiwa boon ki liang ym du ha ki thaw sah, tangwa kiwa kamai kari, kiwa pynbiang baam, kiwa chna tiar hadooh ki warep iwa daw pynchkeh wei pynyoh nong ya kiwa chong chnong.

Ka NPYF East Jaiñtia Hills District Unit da ngait skem ko wa ki kaam pynroi wei wow yada ya ka ramaw toh kiwa lailang chirup wei deiwa ye u yada ya ka ramaw kamjooh i pynkhreh deiwa biang wei deiwa khooid, ini i kreh ha Umiam ye u leh khlem da ktah yeiwa da miat chwa kani ka thaw.

Kamtæ ka NPYF East Jaiñtia Hills District Unit da kyntu ko ya waroh wow jied ki da ka luti wa pait cha waroh ki liang kamjooh wow yaklam heithaw wow pynthut wei wow pyndooh mynsien ya kitu kiwa kwah wow wan pynlut hapoh ka jylla.

Ka NPYF da ong ko wa ka hi man ko kawa kyrchaan ya ki kaam wow pynku ya ka khayi pateiñ, kiwa wanrah yei kaam i jaam wei kiwa ye u neh dei slem neibynta i bha i miat ki bru ka Meghalaya.