U Prime Minister ka ri, u Narendra Modi ynne da yada u ya ka Constitution Amendment Bill wa da wanrah ha Parliament wa e bor ya ka sorkar pyrdi wow pyndooh chuki ya ki Montri wa da jooh chah kset patok.
U Modi hawa klam ha ka yalang paidbah ha Gayaji, Bihar, da ong u wa lada uwa kreh sorkar chah kset patok u 50 kynta da chah beh kreh ki chipor (Suspended) weileh won i jooh ym krehkaam i ya ki PM, CM wa ki Montri.
Chooh chooh da ong u wa ka sorkar NDA da wanrah ko ya ki aiñ pyrchah ya i baamtooh heiwa u Prime Minister leh ym lait u na kani ka aiñ.
U Modi da ong, “Ini wadep da yoo hadooh kammon ya ki File da soi ki hapoh patok hadooh ki hukum sorkar leh da pynmih napoh patok wei lada kiwa yahkhmat man ki kamni, kammon u yaleh pyrchah yei baamtooh.”
Kam wow kdaw heini, u Home Minister, u Amit Shah ha ka 19 tarik da wanrah u ya ka Constitution (One Hundred and Thirtieth Amendment) Bill, 2025 kawa ong wa ye u pynhiar chuki ya u Prime Minister, ki Chief Minister wa ki Minister wa emkti ha ki kaam baamtooh lada chah kset ki 30 sngi khlem chah pynlait.
Neidaw wa kani ka Bill e bor ko wow pynchitom du deiwa suba wa i chah pynbaad donhi khlem da emkaam wow chah rai pynrem da ka yung bichaar, neiliang ka Liang Pyrchah da pyrchah joor ko ya ka neibhah wa man ko pyrchah ya ka Constitution wei da tieñ leh wa ka sorkar pyrdi ye ko wow pynhiar chuki ya ki Chief Minister næ Minister deiwa kset ya ki dei pynemkaam ya ka ED wa CBI.
Discussion about this post