Ka sorkar jylla da e ko jubab hadien wym lai bait i pynman ya ka Common University Entrance Test (CUET) UG 2024 ha North Eastern Hill University (NEHU) wei da pyrkhat wow pynlait ya ka jylla na kani ka CUET deiwa thoh cha ka sorkar pyrdi.
Neiliang u Montri ka chnat puræ puthi, u Rakkam A Sangma da pyntip u wa u Montri Rangbah da chimkia u yeini i kaam deiwa lai rah yeini hakhmat ka sorkar pyrdi deilang waka NTA neibynta i myntoi ki khynnah ka jylla.
U Rakkam da ong u wa ka sorkar daw thoh ko neibynta kitu kiwa yaleh CUET dei thmu wow lai puræ ha NEHU wa ki College wa tipmit da ka NEHU wow e laad ya ki sa chisien næ wow pynlait ki na ka CUET ha uni u snem.
Chooh chooh da ong u wa ka NTA ym em da pynkhreh ko deiwa biang wei da leh khlem da ya krehlang waka sorkar kamjooh khlem da pyntip cha ki bor ka aiñ.
Da khana u leh wa ka NTA da pyntip ko cha ka NEHU heipor wa kyndian bha haka 14 tarik uni u bnai yow pynkhreh neibynta ki 2000 ngut ki wow yaleh Exam tang heipor miet won da ong wa hap ki wow pynkhreh neibynta ki 4000 ngut wei na ini i daw ym yoh por u pynkhreh bha.
Ka NTA waka NEHU da pyntip ki wa em du uwi donhi wym em yoh u thoh ya kani ka CUET neidaw wym hoi ka kor Biometric System, kiwa da booh du 7 tylli heithaw 40-50 kiwa toh u booh.
U Rakkam da ong u wa ka sorkar jylla daw yaklam ko waka NTA yow pyntikna wa i pynkhreh toh u man i iwa mait ha ki por wa daw wan.
ADVERTISEMENT
© 2025 WYRTA Khubor Hei Ktien Pnar
Discussion about this post