Lada ym kem ya ki BSF pynyoo wa ka sorkar pyndem tdong ko hakhmat yong ki: JNC

Ka Jaiñtia National Council (JNC) ha ka kyrwoh na u Publicity Secretary, u Mebanteilang Sukhlaiñ da beiñ joor ko yei leh embor yong ki BSF iwa da jia ha chnong Kuliang, East Jaiñtia Hills District katkam wa da sakhi ha i Video wa da poor kylleiñ kylleiñ.

Ha ini i Video da yoo wa ki BSF da psiah ki cha kawi ka yung wei da klam heh, da klam sih ki deiwa rah leh ya ki tiar pynmynsoo wei ini i leh ki BSF da pynkhyrniat wei da pynhær rngu ko leh ya kiwa chong chnong hadooh kattæ kattæ, sa iwi leh da wan ki heipor wa thiah wa dem ki bru.

Ka seiñ da beiñ joor ko yeini i leh ki BSF wei da ong ko leh wa i leh yong ki toh dei wym burom de ki wot ya ki waheh chnong wa kiwa chong chnong.

Ka seiñ phylla ko leh wa hei sakhiat lada em iwon iwon iwa phær toh u pyntip chwa cha ki waheh chnong, tangwa ym em leh ki wei da lai psiah yabor ki, wei da tba kti ki leh wot yaka manbei katkam wa yoo hei Video, wei ini i leh ki da pynchrai ko hadooh kattæ yaka seiñ wa ki paidbah hi waroh i wym ye de u pdiang.

Related posts

Da kem ya ka kari pulit wa tyrrah hadooh wa yap ya uwa lai Cherry Blossom Festival

November 18, 2024

Dawa ka NPYF wow pynchitom ya kiwa tyrrah ya ka thuk-thuk u khynroo hadooh wa khlaad u

November 18, 2024

Dang ha kini ki bnai wa dep ka seiñ da lai yachem ko markhmat wa u Deputy CM, u Prestone Tynsong wow dawa beh noh ya ki BSF, tangwa hadooh katni ym mankaam i, wei da jia pathan kam ini du neidaw wym bien ka sorkar u beh ya ki.

Ka seiñ booh ko leh i yukylli wa ileh ym pyntip næ yah da ki pulit chwa wow psiah chapoh chnong, neibhah katkam ka aiñ, ki BSF ym ye ki u kreh cha baar u pood kamtæ emkaam wow paan yarap na ki pulit, tangwa ym em leh yeini. Ini i leh ki BSF pynyoo wot ya ki pulit ka jylla leh ym burom de ki. Lada kamni tæ tieñsar wa mynstep mankawi daw leh ki katwa kwah ki khlem da tieñ de ki.

Neiliang ka seiñ da ban joor ko wei dawa joor ko leh naka sorkar wa toh u kem noh syndon ya kitu ki BSF wei u pynchitom ki katkam ka aiñ khlem da thaw chiliang, neibhah ka aiñ toh u kreh ko salonsar hanlada toh ki BSF leh. Wei lada ym ye u kem ya kini pynyoo wa ka sorkar leh pyndem tdong ko ha ki BSF.

Khaddooh ka seiñ phah ko ka kyrwoh wa che cha ka sorkar wa toh u pynkrehkaam salonsar yaka aiñ wei u leh ko leh yeiwa tohsap ymtoh u leh khlot ko yei eh i chon u paidbah wei lada ym leh ko, neiliang ka seiñ daw chim ko i laad wa khor neibynta u yoh yei bichaar wa hok kamjooh leh neibhah i bha i miat ka imlang sahlang.