I pyrchang yong ki bru na Bangladesh wow psiah pyrchah aiñ chapoh ka jylla Meghlaya da pynyang ko hei maa ym du ya kiwa chong chnong ha khappood tangwa ya ka jylla wa ka ri waroh kawi. Ya ini da pynsñiaw da u Montri warim ka jylla uwa man leh u MLA na Amlarem kawa em ha khappood wa ka Bangladesh, u Lahkmen Rymbui.
Hawa pdiang wa ha ki kajiak tayaaw wa dadep wa i pyrchang u psiah pyrchah aiñ ki nong Bangladesh da joor bha ko, u Lahkmen Rymbui da ong u wa ini da man ko i maa lada i pyrchang ki Bangladeshi da nang pteiñ i, neibhah ym em wa tip iyi i thmu ki.
Da ong u wa ki thaw ha khappood toh ki thaw wa rben ki khloo wei da emkaam wow pynkhlan yei paitbniah wei wow khanglaad ya kiwon kiwon kiwa pyrchang u psiah pyrchah aiñ.
Heijooh i por u Lahkmen da e khublei u ya ki paidbah ha ki chnong khappood kiwa yakhun wow khanglaad ya ki nong Bangladesh, ryngkat wa ki pulit deilang ki BSF.
Hawa kylli, u MLA da ong u leh wa i khynreh yong ka sorkar Assam ya ki poi wiar na Bangladesh daw ktah bha ko ya ka Meghalaya lada ym ye wow paitbha neibhah daw em i pyrchang yong kitu kiwa psiah pyrchah aiñ wow wan phet cha Meghalaya.
Discussion about this post