Ka seiñ Hynniewtrep Border Dispute Redressal Forum (HBDRF) da thoh ko cha u Montri Rangbah ka jylla, u Conrad Sangma yow dawa naka sorkar jylla wa yaka Block-I toh u pynuiñ biang cha jylla Meghalaya.
Hawa klam ynne ka sngi, kiwa yahkhmat ka HBDRF, C. Sungoh, u P. Phawa ryngkat wa u Thomas Passah da ong ki wym yahaap yei booh yaka Khanduli waka Psiar Sector neibhah daw wanrah i eh wa ktah yaka Block-I.
Da ong ki wa ka Block-I toh kawa em ha jylla Meghalaya tangwa da pynhaap yabor ha u snem 1952 cha Assam.
Kawi won ka dawa ka HBDRF toh wa lada ka sorkar Assam ym mynjur ko wow pynuiñ yaka Block-I, u Montri Rangbah ymtoh u soi u yaka soskular wow ya pynbait pood.
Da khana wa hadooh kattæ ym pu em kawon kawon ka yalang hajrong ki kaam khappood yow pynbait pood.
Kam wow pynkynmoo wa ka sorkar Meghalaya waka sorkar Assam da dep ki wow pynbait pood ya ki 6 tylli ki thaw na ki 12 tylli wei kiwa dang sah toh sa 6 tylli wa kynthup ki bynta ha West Khasi Hills, Ri-Bhoi wa ha Jaiñtia Hills.
Discussion about this post