Ka Khun Hynyñiewtrep National Awakening Movement (KHNAM) ynne ka sngi da lai e ko dei thoh cha ka Expert Committee hajrong ka Reservation Policy ka jylla, deiwa ong wa toh u bhah kaam bait 80% ya u Khasi, Jaiñtia wa Garo deiwa yaleh kat kiwa ye u yoh yei kreh wei lada ym ye u leh yeini, toh u e 50% ya ki Khasi wa Jaiñtia.
U Working President ka KHNAM, u Thomas Passah da ong u wa seiñ da e kti ko ya 7 tylli ki phang ha u Secretary ka Expert Committee, u LK Lyngdoh ynne ka sngi.
Kawi na ki phang wa da kdaw toh yeiwa da em ha ka Para 1 ka State Reservation Policy 1972 kawa da ong yow kheiñ ya ka Reservation katkam i boon paaid wei lada kheiñ katkam ka 2011 Census, ki Khasi Jaiñtia da tam ki ya ki Garo da 5,78,918 ngut wei da antaad wa ini daw ku i da 9,49,756 ngut manda pyndep ya ka Census wa thymme kamtæ toh u kynmoo yeini hawa kheiñ bhah ya ka Reservation Policy.
Da e buit leh wa yow lait nei ya tyngkhooh yachoon para wa chong chnong ka Meghalaya toh u kheiñlang 80% neibyna ki Khasi, Jaiñtia wa Garo yow yaleh ki kat kiwa biang yow yoh kreh wei lada ym ye u leh yeini toh u e 50% cha ki Khasi wa Jaiñtia.
Da dawa leh wa hawa yaleh kreh wei lada em ki wym em wa thap kreh, yeini ymtoh u kheiñ wa da em wa dooh bhah deiwa rah ki chakhmat manda lait kreh biang neibhah daw yoh da kiwi won ya ini i bhah.
Sa iwi toh wa manda lait kreh neibynta ki Garo, em ki por da e cha kitu kiwa tip donhi u klam Garo wa chaphang ka dustur riti ki Garo hanla ym toh ki Garo, kamtæ yeini leh hap pyndooh noh wei da em ki por da chah da ki Garo kiwa na baar ka jylla wow yaleh yei kreh wa da booh bhah hapoh ka Reservation Policy.
Heiyatoh wa ki kaam ki wym ye u chah kyrriah namo wow Transfer cha baar ka District, toh u em jar jiar ka bhah iwa 80% heithaw mar 40% ya ki Garo, Khasi wa Jaiñtia. Iwa mut ha ki District 80% ki kreh toh u lai ki cha kiwa chong chnong katu ka District.
Sa iwi i dawa toh yow pynkrehkaam ya ka Reservation Policy hapoh ki Semi-Government Department, ki Corporation, ki thaw kreh ki bru samen khang wow yoh myntoi ki khynroo khyllood ka jylla.
Heiyatoh won waka puræ puthi, da ong wa da pynkrehkaam ya ka State Reservation Policy 1972 wot hawa bhah ya ki thaw lai puræ ha ki kyrdan wa heh khlem da yoh bor wei da emkaam wow klam che wa ka Reservation Policy toh u man ko du yei kreh donhi ymtoh ya kiwi ki kaam.
Da kyrpaad leh ya ka Expert Committee wow pynsmat yei kaam ymtoh wow chah pynbiej ha ki buit yong kiwa kwah wow pynslem ya ini i kaam.
Discussion about this post