I khang yaki yaw ki haat ki dukan dukdoh ynne ka 21 tarik hapoh ka jylla Meghalaya kawa da khut leh kam ka Coronavirus Awareness Day (CAD) da man ko kawa lai bait ha chnong Jowai heiwa waroh ki dukan man ki kiwa khang ha waroh ki thaw wei ki paidbah wa em cha sarok em ki du kattu katni ngut kamjooh ki kari samen wa ki kari kamai.
I thmu kani ka CAD toh lyngba ki waheh chnong, kiwa yahkhmat niam, ki VEC ki Village & Sanitation Committee wow pynsñiawthooh paidbah wa ym toh u hær-rngu ym toh u tieñ wei emkaam donhi u man kiwa syndong kamjooh ym toh wow syier mynsien manda sñiaw ya iwa jia cha kiwi ki jylla wa ki ri.
I thmu kani ka CAD toh leh wow pynsñiawthooh paidbah yei rukom poor uni u khñiang uwa da poor na uwi cha uwi u bru hadooh nei tba yaki thaw wa haap uni u khñiang na kiwa em oo wei ye u lait na ini deiwa chong ha yung wei wow yait nei yajan cha ki bru namo ka Social Distancing.
Neiliang u montri rangbah hawa e yei klam cha ki paidbah ynne ka sngi lyngba ka Facebook da ong u wa hanla ym em wa yoh ya u khñiang COVID-19 hapoh ka jylla, ym toh wow kheiñstin i neidaw wa emkaam wow pyntkut ya u kynjri wa poor uni u khñiang deiwa leh kamwa leh ynne ka sngi deiwa chong yung wei wow pynmyllieñ u man kiwa lehkhooid khamtam yei sait kti.
Da pyntip u leh wa ynne ka sngi daw em ka siat dawai ha ki thaw wa boon ki bru u em.
Da kyntu u leh ya kitu kiwa puræ cha baar ka jylla kamjooh cha baar ri kiwa liwan yung ha kam kini ki por wow pyntip ki cha ka sorkar deiwa phone ha u number 108 yow ye u e yarap lada em ki i dak ki chin wa chitom kamjooh wei ye leh u lai haka website http://meghalayaonline.gov.in/covid/ yow pyntip cha ka sorkar. Deiwa pynrap wow chong kset pyn da phi ya phi ha yung 14 sngi.
Da ong u leh wa kini ki 14 sngi man ki kiwa emkaam bha yow lait na kani ka khlam.
U Conrad da ong u wa kani ym toh ka khang chong namo ka Lockdown wei kani man ko du wow pynsñiawthooh paidbah donhi yow chong pyrkhat yeiwa emkaam ki u leh yow pyndooh yei poor uni u khñiang.
Discussion about this post