U montri rangbah ka jylla u Conrad K. Sangma ynne da lai pait u yei kreh ya ki Project ha Tura wa kiwi ki thaw ha West Garo Hills.
Da lai pait u ya i kreh ya ka Tura Medical College ha Doldegre, kawa jngai 7 km na Tura heithaw wa em ka Tura Civil Hospital.
Ha walai pait ya kini ki kreh da synraan ya oo da ki sahep ka chnat i chait i khiah, u Deputy Commissioner ka West Garo Hills wa ki bru na ka Company kawa kreh ya ki project, heiwa u Conrad K Sangma da ong u wa i kreh man iwa suki wei da phah kreh smat ha ki por wa dadep.
Da ong u wa i kreh ya i yung (civil work) ya ka College daw pyndep ha u Naiynru Naiynñiaw u snem wow wan wei da kyrmen u leh wow pynboon ya ki thawthiah ha ka Tura Civil Hospital.
Da phah u leh ya u Deputy Commissioner, u Jagdish Chelani wow pynman ya ki yalangær wow booddien ya i kreh ha kani ka College khnang wow ye u pyndep ya ka ha u 2024.
Chooh chooh da lai pait u leh ya i kreh ha ka Tura Youth Convention Centre, ha Dakopgre wa ka Track and Field Stadium.
Heijooh i por da kyrmen u wow lai smat i kreh wei ngait skem u wa ha ki chisnem chiteiñ daw ye u wai ya ka Stadium wa ka Convention Centre.
