U Montri ka chnat uiñke suwari ka sorkar jylla, u Paul Lyngdoh deilang wa u Symbood Montri Rangbah, u Sniawbhalang Dhar, u MLA ka Jowai, u Wailadmiki Shylla chirup ki sahep sorkar ka chnat Tourism, PWD wa kiwi ynne ka sngi da hiar lai pait lai sylli ki ya kattu katni tylli ki kreh namo ki Project wa da pynkreh hapoh ka West Jaiñtia Hills District kiwa man chibynta u pynku yei kaam uiñke suwari hapoh Ri-loom Jaiñtia.
Nyngkong u Paul Lyngdoh da lai li pait u ya ki Project hapoh ka Constituency u Sniawbhalang Dhar wa kynthup ya ka Spiritual Tourism ha Nartiang kawa haap hapoh ka Swadesh Darshan Scheme yong ka Ministry of Tourism kawa dadep yoh Rs. 25 klur ka mang tangka wei yooluti u leh wow yoh u sdang noh i pynkreh ha ki sngi wow wan, wa ar won ka Eco Tourism Project kawa em ha Pdeng Mukhim Wahiajer.
Hadien ini won da lai li pait u hajrong i pynkreh ya ka Hospitality Complex wa em ha Thadlaskeiñ kawa da mang hei lut wa Rs. 36 klur wei kawa haap hapoh ka Constituency u Wailadmiki Shylla, heiwa da chem wa i pynkreh ya kani ka Hospitality Complex da lai ko chakhmat deiwa pyndep 50% wei yooluti u wa hapoh u bnai November 2026 daw ye pyndep yei kreh chwa u wan ka National Games.
Ha Orchid Inn won kam chibynta ka 2nd Phase da yieñ ka Building wa thymme, kamtæ ya ka poisa kyrchaan na ka Asian Development Bank wa dang sah sa Rs. 9 klur won ong u daw wanrah chooh i chna pynbha pynmiat ha ki thaw wa dang sah.
Discussion about this post