Ka chaad niam Behdieñkhlam hapoh ka Raij Jowai u sdang ko nadooh kani ka sngi Pynsin 11 tarik wei u pynkut won yaka ha ka sngi Muchai 14 tarik. Hachwa wow poi kini ki sngi, ki dong ki chnat waphær waphær wa embynta ha kani ka chaad niam da sdang ki u boon kaam neibynta wow pynbiang pyntoh ya ka dieñkhlam kamjooh ya ki rot, ki rong kiwa man ha ki dur ki rukom waphær waphær.
I pyntoh pyntne ya ki rot, ki rong da ki dong ki chnat waphær waphær dachem wa em kiwa chim u chna da ki rot katkam i pynjooh sikai ki warim waheh neitæ em won leh kiwa chna da kiwi tawon ki rukom, ki dur kiwa em yei yumut wakhia ha ki.
Ki dong kiwa dachna da ki rot toh ka dong Panaliar, Dulong, Chilliangraij, Loomiongkjam, ka Seiñ Tyllilang Niamtre Ladthadlaboh katwa kiwi won ki dong kiwa da chna phylla ha kani ka chaad niam Behdieñkhlam yong uni u snem toh ka dong Loomkyrwiang, Umchangiar, Tpep-Pale, Seiñraij Ummulong wa ka Loompyrdi Iongpiah.
Najrong ini i chna, pynkhreh pynkhrum ya ki rot ki rong, kawi an ka bynta ki dong ki chnat ha chwa wow poi ki sngi yong ka Behdiñnkhlam toh i pom, i thyllem ya ka Dieñkhlam na khloo na kjam, na loom napdeiñ.
