Ka JNC Western Zone deilang wa ki dkhot ka JNC Laskein Block Circle hei yahkhmat u President, u Hamehi Bamon da lai hiar ki cha ka chnong Khatkasla wa Psiar wow lai pait lai sylli ya u sarok wa dang siang rong thymme nadooh yingkieñ Rood Myntang Tihwieh (Khatkasla) hadooh yingkeiñ Rjiang (Psiar) uwa jrong kamwa 4.8 Km wei da booh ka mang poisa wa Rs. 4.57 klur.
Ka seiñ da sñiawngooh ko ya u MLA ka thaaiñ, u Nujorki Sungoh wa da leh chitom u woo pynyoh ya uni u sarok kamwa da dawa ka seiñ.
Ka seiñ da ong ko wa hadien wa da wan yachem ka seiñ wa u MLA haka 22 tarik u November 2024 wow dawa pynyoh sarok cha kini ki thaaiñ khappood ka wym pu em yoh sarok psiang wei u MLA ha kitu ki por da kular u ya ka seiñ wow chimkhia yeini wa dawa ka seiñ.
Ka seiñ da kyrpaad ko leh ya u MLA wow nang lehbhah chooh ya kini ki bru kiwa em cha ka thaaiñ khappood ha kiwa boon ki jait khamtam wow pynjrong chooh chooh ya u sarok hadooh wa poi Mowlber.
Discussion about this post