15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Lai bait ka Chaad Sukra 2021 ka Seiñraij Jowai

Ka Chaad Sukra ka Seiñraij Jowai, 2021 da man ko kawa lai bait hadien wa ha u 2020 neidaw ki kyndon yada naka khlam COVID-19 da lehkmen ya ka ha ki jar jiar ki yung ki sem khlem da yoh wow lehkmen yonglang kamwa jooh leh.

Yaka Chaad Sukra ha uni u snem da sdang ynnin ka 12 tarik da ka yalehke Drama kawa e pyrtuid “Nongrim” kawa da pynman ha Yungwalieh ka Dorbar Chnong Iongpiah, Jowai.

Ynne i step ha Madan Myngkoi Pyrdi heipor step da sdang ya ki lehkmen deiwa yoh ya ki ktein pdiang burom na u President ka Seiñraij Jowai, u OR Challam uwa da khana yei yumut ka Chaad Sukra kawa da leh nadooh warim wa jah chwa wow thung symbe wei da pynkynmoo u leh ya waroh wow deiñ ya ki Mask wei wym chah ya ki khynnah wow lai ki cha Iawmusiang hadien wa pyndep na Madan Biar Ka Blai.

Ha Myngkoi Pyrdi da em 12 tylli ki chaad wa da e wa kynthup leh naka WWC-SRJ, KKC-SRJ, naka Seinraij Ummulong, Seiñ Tylli Lang wa kiwi kam na Chilliangraij, Panaliar, Dulong wa kiwi kiwi de.

Ka phang pyrdi ha uni u snem toh: “A Syiem Myntdu to kit to da kam ka hukum nadooh na chwa”.

Ha Iawmusiang da wan wow sakhi ya ka Chaad Sukra da u AL Hek, Minister ka Art & Culture kam u kongsan uwa da ong wa ka jylla daw dap noh ko 50 snem wei em boon ki kaam wa hap pynman khamtam kiwa yatoh wa ki Cultural Programme, wei neiliang ka chnat Art & Culture ha kini ki kajiak tayaw da dep phah hukum (Notification) cha waroh ki District ka jylla wow pynman yaki Cultural Programme waphær waphær wa ki chnong ki thaw wa em ha ki, wei neitæ daw jied won ya kiwa daw chimbynta hei dap 50 snem ka jylla.

Hawa yatoh wa i dawa ka Seiñraij wow e sngi chuti (Local Holiday) haka sngi Chaad Sukra, da ong u wa daw rah ya ini cha ka sorkar wei daw ya chong pyrkhat chwa wow leh ya iyi iyi neibynta i emkaam ki paidbah.

Hawa pynrap won yei klam kiwa klam ha chwa kiwa da kdaw ya i kyntang ka wah Myntdu kawa kær soodong yaka chnong Jowai. U Hek leh da kyntu joor u ya ki paidbah wow sumaar khooid yaka wah, khnang wym kylla man kam ka wah Umkhrah ha Shillong kawa katni da man kam ka nala wa pyntooid tngit da ki paaid wa chong chnong.

Da kular u leh wow yarap ya ki Scheme waphær waphær wa phah daka Seiñraij Jowai wei da kular u wow chimkhia deilang wa ki arngut ki MP u V. Pala wa u Dr. W R Kharlukhi najrong ki Scheme ha kiwi won ki thaw leh kamjooh.

Ha Iawmusiang da yoh biang ya ki chaad kam naka Seinraij Nongjngi, Loomiongkjam, Loomkyrwiang, Umchangiar, Iongpiah wa kiwi kiwi de.

Hei miet won da pynbood sa ka yakob Chaad Kpær Syntu ha Myngkoi Pyrdi.

Share this:
Previous

87 ngut kiwa dang yoh wa 10 ngut kiwa chait na u COVID-19 ha Meghalaya

Next

Da pynkrehkaam ya ka Night Curfew hapoh East Jaiñtia Hills District