Ka yakob khwe wa tip kam 30th Fishing Competition 2023 kawa da pynman da ka Jaiñtia Fishing & Environmental Protection Association (JFEPA) da man ko kawa lai biat ynnin ka sngi nadooh Damser Treiongriang hadooh Kharthymme Wah.
Neiliang ka Association da e khublei kyrpang ko ya waroh ki dkhot kiwa da chimkhia yei kaam kamjooh kiwa khwe kiwa da wan wow chimbynta hapyrdi i pynthut kiwa da mih wa da kwah u pyndooh pyndam yei lai luti ka seiñ chakhmat.
Ya ka First Prize na kiwa yoh yaka Dakha Pnar da lai cha u Dei Satieñ katwa ka First Prize na kiwa yoh ya ka Dakha Dkhar da yoh da u Suha Passah.
Ya ka yalang saam Prize wa da pynman hei janmiet ha Yungwalieh ka Tpep-Pale, da pynlai wei da pdiang burom ya waroh da u President yong ka seiñ, u D.H. Pde.
Da yoh leh yei klam na ko kongsan, ka R.V. Lyngdoh, CEO, JMB wa na u J.M. Pohsngap, E.M. yong ka seiñ.
Neiliang ka kongsan da ban joor ko yeiwa emkaam bha u pynchlur ya ki bru wow lai li khwe ki kawa man kam ka dawai bah khnang yow yoh ki yei chait i doh i pran wei wow man ki leh kiwa maya ya ka rym-aw.
U J.M. Pohsngap won da batai u yei lai luti ka seiñ nadooh u snem 1993 heipor wa joor bha kiwa leh pynsih ya ki dohum ha wah Myntdu weiwa kammon leh ka seiñ yow wanrah yei kylla.
Ya ki kynteiñ e khublei da yoh na u Secretary yong ka seiñ, u M. Challam uwa da pynchlur ya kiwa khwe khamtam ya ki khynroo wow wan ki chakhmat wow Register ki wa kani ka seiñ khnang wa ka mynried ka Association u man ko kawa skem.
Discussion about this post