Ka JSM hadien wa da tip ko wa ka chnat puræ puthi yong ka sorkar Meghalaya lyngba ka chithi No. EDN:69/2022/110 Dated Shillong the 20 December, 2023 kawa da phah ya ki Principal ki College wa ki Higher Secondary School ha Meghalaya hajrong i emkaam wow yaleh yaka Common University Examination Test khnang wow yoh Admission ha ki College wa da tipmit wa ka NEHU neibhah wym pynlait namo u e Exemption de ya ka Meghalaya wow lait ki u yaleh CUET.
Kamtæ neiliang ka JSM ha ka 16 tarik u bnai nyngkong da phah chithi ko u Montri ka chnat puræ puthi kamjooh cha u Montri Rangbah wa u Chief Secretary deilang cha ki DC yong waroh ki District ha Ri-loom Jaiñtia wow pynyoh ya ki thaw thoh namo ki Exam Centre yong ka CUET ha Shillong, Tura wa Jowai næ ha waroh ki District Headquarter.
Kam chibynta wow lai booddien yeini, ka seiñ ynnin ka sngi da lai yachem ko ya u DC ka East Jaiñtia deilang wa u DC ka West Jaiñtia Hills yow booh le tylli ki kyrpaad khnang wow pynsuk ya ki khynroo khyllood ka thaaiñ kiwa hap u thap ya ki Online Application neibynta ka CUET.
Da kyrpaad ya u DC wow phah ya ka NIC Cell hapoh DC wow yarap ya ki khynroo khyllood wa lai puræ yow pyndap ya ka Online Application.
Da kyrpaad leh yow phah ya ki BDO wow booh da ki Centre wa chipor ha ki yung krehkaam Block khnang wow suk thap Online Application yong ka CUET.
Chooh chooh wow phah ya ki Common Service Centre namo ki Rainbow wow yarap ya ki khynroo khyllood wow leh ki ya iwa emkaam u pyndep Online.
Ha i yaklam wa u DC, neiliang yong oo da kular u wow phah ya ka NIC hapoh ka yung krehkaam yong oo wow yarap ya kiwa thap Online Application, wei wow hukum ya ki BDO wa ki Common Service Centres wow e laad yarap ya ki khynnah.
Neiliang ka seiñ da kyntu ko ya ki khynnah wa nadooh ki kyrdan HSSLC wow wan chakhmat yow thap pyrtuid neibynta ka CUET neibhah da sah sa du kattu katni sngi heiwa ka tarik wa khadooh toh haka 26 tarik uni u bnai.
Discussion about this post