Ka Dorbar Chnong Chilliangraij, Jowai chirrup i ya krehlang wa ka chnat krehkaam ka Forest Wildlife, Division, ynne ka Musiang 8 tarik ha ka thong wow yada wow pynneh pynsah yei miat yoosuk i man i long ki soodong sookun ka Bei Rymaw wa ki sim ki dih kamjooh ki khon ka thwai ka langen kiwa em ha chilynter ki bynta ka wah Myntdu da chim ki wow booh yaki Signboard nadooh Mupiah chadooh Khloo Ram Pyrthai.
Ka thong i booh ya kini ki Signboard toh man i chibynta ki adong næ ki aiñ sorkar wow khoom wow kdoh yaki bru wa uiñ wa lai kamjooh kiwa likhwe ha chilynter ki bynta ka wah Myntdu, wym toh u leh ki ya yaki kaam huria human kiwa ktah yei man i long ka Bei Rymaw wa ki sim ki doh kiwa em ha ki khloo ki kjam kamjooh ha ki thwai ki langen yong ka wah Myntdu.
Ha kani ka sngi chwa wow booh yaki Signboard da em ka yalang wa tbian hei pynlai u Oriland Shylla, Assistant General Secretary wei da yoh leh yei klam na u waheh chnong u Damehiwot Pde kamjooh naka Heisakaru Lato, DFO, Wildlife Division, Jaiñtia Hills District.
U waheh chnong hei e kyntien ha kani ka yalang da ong u wa ka dong ka chnong yong ki toh kawa kær talawiar da ki khloo ki kjam wa ki liar, ki thwai yong ka wah Myntdu heiwa hei doh i rynyieñ yong ki em chiboon ki sim ki doh wa boonjait boon rukom wei hapyrdi i em yong ini i kyrkhu ka rymaw, em leh chiboon ki bru chimkabu wow leh ya ki kaam wa man pyrchah ya ka aiñ bru aiñ Blai.
Kamtæ ha kani ka por dei pyrkhat wei yoojngai yong ka Dorbar Chnong chirrup i yahkrehlang waka Wildlife Division yong ka Forest Department da chim ki wow booh yaki Signboard ki wow man chibynta ka luti wow pynsñiawthooh yaki paidbah wa uiñ loom uiñ wah chaphang i emkaam wow sumaar wei pynneh pynsah ya i miat yoosuk ka rymaw kamjooh yaki sim ki doh wa em ha loom kamjooh ha thwai.
Ka DFO da yaroh ko yaka Dorbar Chnong Chilliangraij kawa da chimkhia wow leh yeini i kaam wa bha heiyatoh wow sumaar wei pynneh pynsah yei man i long ka rymaw wa kiyi kiyi kiwa em soodong yong ka.
Kam ka bru wa da dep puræ bniah da ong ko wa i em yong ki khloo ki kjam, ki loom ki wah wa ki sim ki doh, man i i kyrkhu wa khroo ya i ki bru liang wa nang, kamtæ emkaam u yaleh katwa ye wa lah wow sumaar pynneh pynsah yaki heitæ i rukom i wow e myntoi ym du kat ya kani ka pateiñ kawa katni wot yaka pateiñ wa daw wan leh i jooh næ u rap miat rap bha chooh chooh.
