I pynkhreh ya ka 6th Meghalaya Games 2025 wa daw man ha Jowai, West Jaiñtia Hills District ha uni u bnai deiwa em palat 4000 ngut ki khynroo khyllood yalehke Sports ki wow wan chimbynta haki jait yakob waphær waphær kiwa em hadooh 25 jait, da man kawa lai bait lai ryntih chakhmat la heiyatoh ki thaw wow pynman yaka lympung yalehke, ki thaw sah neibynta kiwa wan wa kynthup nadooh ki wow yalehke wa wan na baar ki District, ki Official, ki thaw baam wa kiwi de.
Wei ya ki dak ki chin yong i pynkhreh wow pdiang ya ka Meghalaya Games da sakhi leh lyngba i e rong e rup, i pynphooh pynphieñ ya ki sarok ki luti syngkeiñ, i pynchna ya kiwa da rim da sih kam ki sarok, ki Indoor Hall, ki skur, ki madan wa kiwi najrong wa em leh i chna tymmme ha ki bynta waphær waphær ka chnong Jowai khamtam ki thaw wa chah jied neibynta ka Meghalaya Games.
Ki thaw wa chah jied neibynta u pynman ya ki lympung yalehke kynthup ya ka Lion Mission Compound Indoor Hall, ka Madan Biar wa em ha Lion Mission Compound waka LP School Presbyterian Jowai, neitæ ka Kiang Nangbah Indoor Sports Hall, ka Thomas Jones Synod College, ka Chutwakhu Indoor Hall, ka madan Jrisaleiñ wa em ha Chutwakhu, ka Kiang Nangbah Football Stadium, ka Kiang Nangbah Govt. College Indoor Hall, ka Dulong Indoor Hall, ka Dulong SSA UP School, ka Seiñraij Indoor Sports Hall, ka Madan Ryngkaw Tpep Pale, ka Ladthadlaboh Secondary School wa Indoor Hall, ka Khimusniang Indoor Hall, Tpep Pale Indoor Hall, ka Northeast Adventist University Khliehtyrchi, ka Madan Tre Tangliang ha Ialong, ka Wahiajer Stadium, Indoor Hall Wahiajer, madan Lad Mukhla, ka Khliehtyrchi Indoor Hall wa kiwi.
Hei booddien yow sñiawthooh wa hadooh katwon i pynkhreh neibynta kani ka Meghalaya Games ha ki thaw wa chah jied, kamjooh leh i myntoi wa ki paidbah ye ki u yoh lyngba i wan yong ka, da yohlaad u yaklam wa ki kattu katni ngut kiwa yahkhmat chnong ka sor Jowai wa ki dong ki chnat kiwa chah jied ha ka Meghalaya Games, neitæ kiwa yahkhmat ka Seiñraij Jowai hajrong i chah jied ki thaw yong ka, kamjooh wa u Vice President ka West Jaiñtia District Sports Association kawi na ka seiñ wa yalehbha u pynku yei kaam yalehke Sports hapoh ka District.
Hei yoh u yaklam wa u waheh chnong ka Chutwakhu, u Philanderwell Lyngdoh, u General Secretary ka chnong Chiliangraij, u Oriland Shylla, u General Secretary ka Seiñraij Jowai, u Arwotki Sumer, u EC Member ka Lion Mission Compound, u Daunihiwot Synrem wa u Vice President ka WJDSA, u Patrick Lamare khana ki wa i wan ka Meghalaya Games ha West Jaiñtia Hills District da man sakhiat i myntoi wa khroo ya ki kaam kiwa chah jied ki thaw neibynta ki jait yalehke waphær neibhah wa da e rong ya ki Indoor Hall, i pynchna yei bynta wa sih wa kamjooh i wanrah yei chna tymmme.
Wei hanla kani ka Meghalaya Games u neh ko du kajiak sngi donhi ha District, tangwa iyi wa da leh lyngba i wan ka Meghalaya man i myntoi wow neh sah khana parom.
Discussion about this post