24 ngut ki khynroo khyllood na kylleiñ ka Meghalaya da chah jied ki wow lai chimbynta ha ka International Youth Exchange Program ha Jakarta, Indonesia kawa da pynman nadooh ka 16 hadooh ka 22 tarik uni u bnai.
Kani toh kawa da sdang ha u snem 2015 yow e laad ya ki khynnah skur kamjooh kiwa lai College wow chimbynta ki ha ki yakob hapoh ka District neitæ ka jylla wa hapoh ka ri yow yoh u lai cha baar ri yow pynyoo yei sap kamjooh ka riti dustur yow tip leh chaphang i rukum im wa ka dustur riti yong kiwi.
Kiwi de ki thong toh yow wanrah yei sñiawskem wei ya krehlang wei yow ya sñiawthooh leh ya kiwi yow em i yatoh lok wa neh rta.
Kani ka kynti da man ko ka sien wa soo wa da lai kiwa na Meghalaya cha kani ka International Youth Exchange. Na ki 600 ngut kiwa da wan chakhmat, da jied 24 ngut na ki 12 tylli ki District wei chwa u lai ki da pynman ya ka e sikai pynsñiawthooh wa ar sngi ha Shillong ha ka 14 wa 15 tarik uni u bnai chwa u lai ki cha Jakarta lyngba ka Singapore.
Deilang wa kini ki khynnah da em leh soo ngut kiwa mihkhmat neiliang ka Directorate of Sports and Youth Affairs heiwa dapoi ki ha Jakarta ha ka 17 tarik wei da yoh ki wow lai cha kiwa boon ki thaw wa bna naam wa kiwa em parom ha kani ka sorbah kawa man leh ka nongbah ka Indonesia.
Ha ka 19 tarik da chimbynta ki ha ka yalang wow pynyoo ya ka dustur riti wa da emlang ki kynroo ka Indonesia ha St. John Bosco Parish, Jakarta heiwa da pdiang burom ya ki da u Parish Rector, u Fr. Paulus Rarasta SDB wei da pynyoo ya ki leh ya ki jait sikai wa boon jait wa e ha ki thaw puræ wa em ha Jakarta.
Ha ka 20 tarik won da yoh ki wow lai cha Bali yow chimbyna ha ki yalang wa da pynman da ka Directorate of Sports and Youth Affairs.
Discussion about this post