Ka Khasi Students’ Union (KSU) West Jaiñtia Hills District Unit, ynne da lai e dorkhat ko ha ka Montri ka chnat i chait i khiah, ka Dr. Ampareen Lyngdoh yow kyntu ya ka wow pynku kyrdan ya ka Barato PHC cha ka Community Health Centre (CHC).
Katkam wa ong ka seiñ, kani ka PHC toh kawa pait ya 13 tylli ki chnong kattu awjan 40 snem wei da pynkrehkaam ka da ka NGO kawa tip kam ka Jaiñtia Hills Development Society.
Ha ka dorkhat da ong wa ha ki snem wa da lai, i boon bru da ku i wei ha u snem 2023-24 da em palat 21,014 ngut, kamtæ kiwa kreh ym ye de ki neidaw wa da khia kaam ware wei da kyntu ya ka Montri wow chimkhia ko ya ini i kaam.
Da dawa leh na ka Montri wow chimkhia ya u sarok wa da sih wa lai cha ka Namdong CHC neibhah da chem chitom bha ki bru neidaw wa joor ware sih uni u sarok.
Chooh chooh da dawa leh wow tuklar ka Montri yei kajia ki san chnong heiyatoh wa i thaw yow booh ya ka Sub-Centre ha Slaruin (chnong Madanrwan).
Ka seiñ da khana ko wa ha u snem 2021, ka KSU Mynksan Unit da dawa ko naka yung krehkaam u DMHO West Jaiñtia Hills wow booh Sub-Centre yow myntoi ki san chnong, kitæ ka Mynksan, Ionglang, Kyrwen, Madanrwan wa Niawkmai.
Hadien ini da mynjur wow leh yeini wow booh Sub-Centre wei ka Committee kini ki san chnong da mynjur ki wow booh ya ka Sub-Centre ha i thaw wa man pyrdi yow myntoi waroh tangwa da mih noh i thut neidaw wa em i yakajia hapyrdi kini ki san chnong.
Discussion about this post