Ka Hynniewtrep Youth Council (HYC) East Jaiñtia Circle wa Narpuh Circle, da lai e dorkhat ko ha u Deputy Commissioner ka East Jaiñtia Hills District, heiyatoh wa pteiñ ki nong Assam wow khloh moo na ka Wah Malidor kamjooh leh i yoh mooyong ki kharkhna Coke Factory ha ki thaaiñ Narpuh.
Heiyatoh wa i yoh mooyong ki Coke Factory, u DC da khana u ha ki dkhot ka seiñ wa kamwa man katni, ka NGT da dep chna ko ya ka Committee wow pait ya kani ka Report wei neiliang yong oo ym ye u wow leh iyi iyi leh neibhah ya katai ka Committee da dep jeid ya le ngut ki bru wow pait ya ini.
Katwa heiyatoh wa i pteiñ u khloh moo ki nong Assam ha ki bynta yong ka wah Malidor, da ong u wa kamwa man katni ym ye u tip wa ha ki bynta katai ka wah, kiyi wa mantre, tangwa neiliang yong oo, daw hap u wow pynbait chwa wow yaklam lang wa ki bor District ka Cachar, Assam wei kani ka District hap ko wow pait lang, tangwa kamwa man katni ym pu ye wow leh neibhah ka jylla Assam ka dang em ko hei pynkhreh yaleh Election.
Neiliang u Michal Chyrmang, Vice President HYC EJHD Circle hadien wa yachem ya u DC da ong u wa neiliang ka seiñ ym kut i dawa yong ka du heini wei daw lai phah dei thoh chadooh ki dkhot ka Committee ka NGT khnang wa ka NGT u pynchitom ko ya ki kharkhana kiwa tyngkheiñ aiñ. Chooh chooh da ong wa katkam i chem wa em du ki kattu katni ki Coke Factory wa biang ki kot ki sla tangwa kiwa boon toh kiwa man pyrchah wei tyngkheiñ aiñ suda.
Neiliang yong u Publicity Secretary, HYC Narpuh Circle, u P. Syiemlieh da ong u wa kamwa man katni, i khloh moo da ki nong Assam ha ki bynta ka wah Malidor man ko chawa palat wei da toor leh chadooh u pood u ang yong ka jylla, kamtæ neiliang ka seiñ da kyrpaad joor ko ya ki bor wa toh u pait wow leh smat yeiwa emkaam smat yow lait u jia iwa ym sñiawsuk.