Khliehriat: Ka Joint Action Forum (JAF) yong ki soo tylli ki seiñbhalang kitæ ka Southern Border Youth Welfare Association (SBYWA), Jaiñtia Student movement (JSM), Jaiñtia Youth Federation (JYF) waka North East Indigenous People Federation-South Eastern Border Region (NEIPF-SEBR) deilang waki soo chnong ka chnong Umsatai, Ladwahwapung, Pynurkba waka Deiñsatlang. Ynnin ka sngi da lai e dorkhat ki cha u khlieh ka East Jaiñtia Hills District u F.M. Dopth (IAS), hei yahkhmat yong u Chairman u Shnalad Rymbai deilang wa Secretary u N.L. Talang waki dkhot yong ka kam chibynta wow phah khang wow chna ya katai ka karkhana (Coke Plant) kawa em ha Wah Deiñling yong kitai ki soo chnong wei katkam wa man kattæ da sdang wow chna yaka.
Hadien ka yalang, u Working Chairman ka JAF hawa klam wa kiwa thoh khubor da kyntu u ya ki bor sorkar wow chimkhia ko ya kani ini i dawa yong ka JAF wow phah khang chi syndon wow chna ya katai ka karkhana khamtam kam ha ini i por wa dang joor ka khlam COVID-19.
Chooh chooh u Chairman ka JAF u Shnalad Rymbai da ong u wa da kular u DC wow chimkhia ya kani ka kaam wow yaklam chadooh ka Meghalaya State Pollution Control Board wa cha ka Directorate of Commerce and Industry yong ka sorkar Meghalaya, da pyntip u leh wa ka JAF da e por ko hadooh ka 18 tarik uni u bnai wow phah khang chi syndon ka sorkar wow chna ya katai ka karkhana kawa em ha kitai ki soo chnong khnang yow lait u mih ka awri awra ha kitai ki thaaiñ.
Ha iwi tawon i liang, ha ka yalang kawa pynman ha ka 13-07-2020 ha yung krehkaam ka JSM Central Body, Khliehmyntriang, da iwi i sur, ka Executive Committee yong ka JAC da rai ko wow pynkylla ya i pyrtuid cha ka Join Action Forum (JAF) kawa kynthup ya ki seiñbhalang kam ka SBYWA, JSM-ER, JYF-EJH, NEIPF-SEBR wa ki soo chnong wa kynthup ka Umsatai, Ladwahwapung, Deiñsatlang, Pynurkba hajrong ka yurim wow pyrchah bait ya ka Unique Industry Coke Factory kawa sdang pynkreh ha Wah Deiñling kawa haap hapoh u pood u ang yong kitai ki soo chnong neidaw wa pyrchah joor bha kiwa chong chnong yong ki.