Jowai: Ka Synjuk Waheh Shnong Ri Jaiñtia da lai e dorkhat ko ynne ka 16 tarik ha u Superintendent of Police, West Jaiñtia Hills u L. Syiem, hajrong kiwa boon ki phang yow kyntu kyrpaad ya ka Police Department wow pynkrehkaam ya ki laad wow pynsuk hei liang ka sahkut kari khamtam heipor lai wa heipor wan skur yow suk ki khynnah skur kamjooh kiwa lai khreh, laikhih, lai yaw lai haat.
Yow pait yow sylli leh yei wan psiah wan mih ki baar ri ne ki Foreigners wa kiwi heiyatoh wa i pynbna ka jylla Assam ya ka NRC dang ha kini ki chibet por, da kyrpaad leh yow booh ya ki Police Outpost næ ki thaw chong ki pulit wow yang yow sonteri ha ki khappood yow yada na i toor pood yabor lehbor.
Ka Synjuk da kyntu ko leh ya ka Police Department lyngba u SP wow yaleh u pyndooh jait ya ki kaam sih kaam roi kam i dai kiad pyrchah aiñ, dai drugs wei dih drugs dih bhang, ki kaam awria, kaam tooh, kaam thok kaam chukor, ki yachoh yadat, ki kaam pynyap, lute wa kiwi kiwi ki kaam sih wa boonjait.
Ka Synjuk ngait skem ko leh wa ki pulit u ye ki u leh yeini waroh deiwa ya krehlang nadooh ki waheh chnong ki MDC ki MLA chirup wa kiwa chong chnong waroh.
Ka Synjuk da yaroh ko leh yei chlur, i kreh chitom ki pulit hapoh i yahkhmat u SP wei da kyrmen wa i stat krehkaam yong ka District West Jaiñtia Hills u man ka District kawa chongsuk chongsaiñ ha ka imlang sahlang.
Khaddooh ka Synjuk kyntu joor ko ya ki Dorbar Chnong wa em cha sor, cha khapsor wa nongkyndong wa kiwa chong chnong wow ya krehlang yow man i kaam wa jop pynkut ka wyrta na u President yong ka Synjuk u A. Lipon.
Discussion about this post