U MLA ka BJP na Pynthorumkhrah uwa man leh u montri warim ka sorkar MDA, u Alexander Laloo Hek ynne i janmiet da lai e khublei u ya u MLA ka BJP na South Shillong, u Sanbor Shullai uwa da thung salan kam u montri wa thymme ha ka sorkar wa yahkhmat da ka NPP.
U Alexander da dooh noh u ya ka chuki kam u montri deiwa ekti noh ya ka cha uwi tawon u MLA katkam ka ka rai ki heh ka Party na Delhi, hanla ym emlang u heipor wa u Sanbor chim smai u, tangwa hei janmiet won u Alexander da lai u cha yung sah u Sanbor wow ekhublei kyrpang ya oo.
Neiliang u Alexander da ong u wa ym em iwon iwon i wit neidaw wa hap dooh noh u ya ka chuki montri deiwa ong wa da chakri u kam u montri ka sorkar MDA palat 3 snem kattu wei da toh i por wa u Sanbor u kynrong u ya ki kaam chaphrang ha ka sorkar wei wow pynjanai chooh chooh ya ka Party wow yoh u synchaar ha u 2023.
Hawa kylli, da ong u wa da hap ngait ya i rai ka Party wei ha i kaam chakri paidbah ym jooh kut i wei ya kiwon kiwon ki kaam wa dang sah daw krehlang u wa u Sanbor wei da kyntait u leh wa em i yaphær yumut ha i kreh deiwa ong wa ini waroh neibynta i bha ki paidbah.
U Alexander da ong u wa ya iwa da rai da ki heh ka Party toh iwa da sñiawthooh lang da waroh ar ngut ki MLA.
