U Montri ka sorkar pyrdi wa pait ya i pynmih mooyong wa ki kaam ka Parliament, u Pralhad Joshi da chong knor u ya ka yalang ka Central Coalfields Limited (CCL) waka Bharat Coking Coal Limited (BCCL) ha i yung krehkaam ka CCL HQ, ha Ranchi ynne ka sngi deiwa emlang u V K Tiwari, Additional Secretary, Ministry of Coal, u Pramod Agarwal, Chairman, CIL wa kiwi de ki sahep sorkar.
Neiliang u Montri da lai pait u yei pynmih mooyong wa i dai i thied mooyong ka CCL wa BCCL. Da phah u leh wow pyntikna wa i pynmih mooyong wa i pynpoi cha ki thaw pynmih bordiñ ym toh u thut i.
U Joshi da ong u, “Ka samoi lehkmen da sdang ko wei toh i kamram yong i yow pyntikna wa u mooyong ym toh u thut u poi u cha ki thaw pynmih bordiñ”. Da ong u leh wa kini Company pynmih mooyong toh u leh ki yeiwa emkaam yow pyndooh ya iwon iwon i eh i khoo heiyatoh wa i tih wa i pynmih mooyong. U Joshi da phah u leh ya ki heh sorkar wow e mynsien ya ki wakreh yow pynjoor yei pynmih wei chalan ya u mooyong.
Chwa kani ka yalang, u Montri da lai pait u leh yei thaw tih mooyong wa tip kam ka Ashoka Mine wa em ha thaaiñ Piparwar ka CCL ha Chatra District, Jharkhand. Da yaklam u leh wa ki wakreh yow e mynsien ya ki yow pynboon yei pynmih mooyong na kani ka paar moo. U Montri da lai pait u leh ya ka Bachra Railway Siding ha thaaiñ Piparwar Area, Ranchi deiwa banjoor yei emkaam wow pynpoi ya u mooyong wa bha wa kit da ki rel.
Neiliang ka Ministry of Power da pyntip ko wa ka Power System Operation Limited (POSOCO) da khana ko wa i duna i ye pynmih bordiñ da hiar na ka 11 GW haka 12 tarik uni u bnai cha ka 5 GW hadooh ynne ka 14 tarik wei ini da yarap ko wow pynduna yei ye u pynmih bordiñ neidaw wa duna mooyong heiwa ha ka 13 tarik uni u bnai da man ko 6 GW.
