Ka seiñ United Hynniewtrep Movement (UHM)-East Jaiñtia Hills District ynne ka sngi kam chibynta wow pynyoo yei sñiawngooh wei burom ya uwi na kiwa chong chnong ka East Jaiñtia Hills, da lai ki wow e sñiawbha cha u Norly Ryngkhlem uwa jooh man kam u waheh chnong warim ka chnong Wapungskur.
U Norly Ryngkhlem man u leh kam uwa da seiñ da sdang ya ka Gold Cup Football Tournament kawa pynman da ka Wapungskur Sports & Social Welfare Organisation (WSSWO) kawa man leh kam kawi na ki lympung yalehbol wa heh bha hapoh ka District.
Najrong ini, u Norly Ryngkhlem da sdang u leh ya ka yaaw wa em hapoh ka chnong Wapungskur wei katni da man u leh kam uwa u buit namo u Advisor ka East Jaiñtia Hills District Football Association.
Neiliang ka seiñ da e sñiawbha ko da ki Tracksuit deilang wa ka tupri heiwa neiliang u President ka seiñ, u Brosenly Siangshai da kitbok kitrwiang u ya u Norly Rynkgkhlem yow yoh u dei chait i khiah, i stat wei chemphang chooh chooh yow ye u wow kit u bah ya ki kaamram yong oo.
Da pyntip u leh wa ka seiñ yieñ hi ko ha ka yurim wow lai e yarap leh cha kiwa dooh wa rangli wa em hapoh ka District wa ha waroh kawi ka Bri u Ynñiawtrep.
Neiliang u Norly Ryngkhlem da e khublei u ya u President ka seiñ wei kamjooh ya ki dkhot ka seiñ yei wan e sñiawbha ki ya oo wei da kyntu u leh wow pait lang ya kiwi kiwa emkaam yarap wei da sñiaw u leh wa ka seiñ toh kawa jooh lai e yarap cha ki manyung wa emkaam yarap, kamtæ da kitbok u ya ka seiñ wa u Blai u emlang u wa ki yong nang roi ki wei wow nang yoh ki sa kiwi ki laad ki kabu wow yarap ya kiwi.
Puræ leh: Da khut ya kiwa kwah wow chimbynta ha ka 29th Gold Cup Knockout Football Tournament 2023
Discussion about this post