U Symbood Montri Rangbah ka jylla uwa pait ya ka chnat Home (Police), u Prestone Tynsong da ong u wa ha i klam yasuk wow chong biang wa ka Hynniewtrep National Liberation Council (HNLC), ka sorkar kwah ko wow yaklam wa ki bor wa hajrong ka seiñ da u Chairman namo u General Secretary.
Kam wow kdaw ka HNLC da pynsñiaw ko yei pyrchah wa joor wa mih ka hukum na ka sorkar jylla dang ini wow khut hajir ya u Saiñkupar Nongtraw, u General Secretary/Publicity Secretary ka HNLC, wow lai mih u cha ka kasari wei ini i hajir toh leh hawa ka seiñ dang em ko hapyrdi u yaklam yasuk wa ka sorkar.
Hawa klam ynne ka ka sngi, u Prestone da ong u wa nadooh i yachem wa nyngkong da dep wow pynche wa ka sorkar kwah ko wow yaklam wa ki bor wa hajrong ka HNLC, ym du u Vice Chairman, deiwa pynrap wa lada ka HNLC chimkhia ko u lai chakhmat wa i klam yasuk, sñiawbha wow phah ktien næ chim ya i rai lyngba u ksiang uwa da booh ki.
Neiliang u Prestone da phah u ka wyrta cha ki heh wa hakhmat ka HNLC wow wan chakhmat neibhah waroh ar ki sorkar yang ki wow ye u pynlai chaphrang ya i klam yasuk.
Hawa kylli, u Prestone da ong u wa neibynta i yaklam wa bood, ka sorkar yang ko ya ki heh ka HNLC wow phah ktien wei chong ha ka HNLC wow jubab mynnu wow em biang i yaklam, wei neiliang u Prestone da klam che u leh wa la kammon kammon u Chairman næ u General Secretary ka HNLC toh u em ki ha ka yaklam ha ka sien wa ar.
Discussion about this post