Jowai: Ka HYC-Nongthliew Circle hapoh i yahkhmat u President ka seiñ, u Joplang Kharnaior deilang wa ki dkhot wa u Sordar ka chnong Nongthliew, u Peter Anton Umwi ynne i step da lai saam ki da ki kymmor cha ki 22 tylli ki manyung wa chah ktah ha ka æryong ha ka 27 tarik ha ka thaaiñ Nongthliew wa kynthup ya ka chnong Nongthliew, Umthlong wa Langkyrteng katkam wa tip ka seiñ.
Kamjooh da chah ktah leh ar tylli ki skur wa kynthup ya ka Phan Nonglait wa ka Kharbaniang LP School wei hawa kheiñ waroh da em hadooh kamwa 40 tylli ki manyung wa da chah ktah.
Ha ini i jia da em le ngut ki bru wa mynsoo wei uwi na kini uwa da mynsoo joor da yah cha ki thaw sumaar dei yarap kiwa chong chnong ka Umthlong Kharbaniang heiwa ka seiñ da e khublei ko ya ki paidbah kiwa da kdup da kdung ya kiwa chah ktah khamtam u Vice President ka seiñ, u Jromen Kharthangmaw uwa da chimkhia wow pynpoi ya kiwa mynsoo cha ki thaw sumaar da ka Ambulance ka Circle.
Hajrong ini i jia ka seiñ da kyntu ko ya ki bor district wa ki sahep sorkar, ki MLA wa MDC wow chimkhia ki wow e yarap cha kiwa chah ktah khamtam kiwa dang khian dang khynnah.
Discussion about this post