Jowai: Ka Jaiñtia Youth Federation (CB) ynne ka sngi da lai e yarap ki da ki tiar ki tar cha ka yung ka Rihun Suting, na chnong Sohmynting, kawa da chah baam lut ha i diñ ha ka 26-12-2019. Ka seiñ mar ya yoh yutip ko chaphang ini i jia da rai ko wow lai e yarap cha kani ka manyung.
Kamtæ ynne ka sngi ka seiñ hapoh i yahkhmat u President (CB) u O.L. Tariang, General Secretary u S. Pajuh, President ka East Jaiñtia u J. Pala deilang wa ki kattu katni ngut ki dkhot da lai ki wow e yarap da ki Tin chna yung, u khoo wa ki kymmor cha ka yung ka Rihun Suting.
Ha kani ka sngi da emlang u Dolloi ka Elaka Amwi, u Asst. Waheh Shnong, u Secretary chnong wa kiwa chong chnong ka Sohmynting. Chwa wow e ya kini ki tiar da em ka yalang wa tbian kawa da pynlai da u E.S. Langshiang uwa man u sahep ka DDM. Da yoh leh yei klam tbian na u Dolloi, u Asst. Waheh Chnong, u Secretary chnong kiwa da pynsñiaw yei sñiawngooh ya ka JYF wa smat ki wow e yei kti yarap cha kiwa chem chitom.
Ka seiñ hawa pait yei baam i diñ nadooh ka poisa, ki tiar ki tar, u kba, ki dieñ neibynta wow chna yung wei waroh katwa emlut da chem wa i dooh nong da poi ko cha ki phaw lak tyngka.
U President ka JYF da kyntu u ya ki bor wa toh u pait yong ka chnat sorkar, kiwa mihkhmat nadooh u MDC wa MLA yong kani ka thaaiñ wow chimkhia ki wow e yarap smat ya kani ka manyung wa da chem chitom.
Discussion about this post