Ka Meghalaya Scouts and Guides Fellowship (MSGF) Jowai Unit dei mynsien wa sñiawkhia, ynnin ka 27 tarik da lai pyntngen wei lai e yarap ko ya ka manyung kawa em ha Ummulong kawa da dooh ya ar ngut ki khon hadien wa i diñ da baam lut i ya i yung wa sah ki ha ka 21 tarik uni u bnai.
Ya ini i i lai ka MSGF da yahkhmat da ka Rithelma Passah, Chairperson hei emlang ka Lahairoi Lamare, Secretary deilang wa ar ngut ki dkhot, ka Aloma Passah waka Gracely Pde.
Neiliang ka Rithelma da e ko ya i klam sneiñ kyntu ya ka manyung wei da e mynsien wei da pynchlur ko ya ki chi kurim wa da dooh ya ki ar ngut ki khon.
Da kitbok leh ya ka manyung wow yoh ki yei chait i tram wei wow yoh ki yei bha i miat neini chaphrang dei emlang u Blai chirup wa ki.
