I chah khut hajir ki dkhot ka KSU ha ki bor pulit cha ki Police Station waphær waphær ka jylla dang pteiñ i hadooh ynne ka sngi neidaw wa li kynreh ki ya ki baar jylla wa wan kreh mylla chapoh ka jylla khlem da em ki kot ki sla wa biang.
Ynne ka sngi ha Amlarem Police Station leh da chah kut hajir ki dkhot ka KSU wa kynthup ya u President ka KSU West Jaiñtia District, u Laitphar Syngkrem wa u President KSU War Jaiñtia Circle, u Lop Khonglah neibhah wa hapoh West Jaiñtia Hills leh da lai ki chakhmat wow kynreh baar jylla ha kini ki sngi wa dep.
Heipor wa lai hajir kini kiwa yahkhmat ka seiñ da synraan lang leh da ki dkhot ka West Jaiñtia Hills District wa ki dkhot ka War Jaiñtia Circle.
Hadien wa mih na Police Station, u President ka KSU West Jaiñtia District, u Laitphar Syngkrem da ong u hei sakhiat toh u khut hajir ki ya ki Contractor kiwa yah da ki baar jylla cha ka thaw yong i khlem biang ki kot ki sla tangwa da khut pathan da ki dkhot ka seiñ.
Ong u yoosar ini toh i buit donhi ka sorkar wow pyndait-thah næ pyntlot ya ka seiñ heiyatoh ki mat wa lai luti, tangwa ka khubor wa che hi ong ki kat nangchah khut hajir ki leh u nang pteiñ u kynreh baar jylla ki, wei ym chong-ngiah hi ki leh kat wym pu yoh ya ka aiñ yada jaitbru khnang yow chngaaiñ ka pateiñ wa kynthup wow pynkrehkam ka sorkar ya ka MRSSA wei pynyoh ILP.
Chooh chooh pynrap u wa ini i leh ki wym toh kawa pyrcha aiñ tangwa du neidaw wym kreh ka sorkar yei kaam, kamtæ ym yohsa ki wow pna leh da ki hi.
Da kdaw ki leh wa wot ka Check Gate wa pynyieñ ha Umling neibynta u kynreh ya ki baar jylla leh man yung jæd hi-eh ko khlem bru.
Discussion about this post