U Director General of Police (DGP), u Dr. Lajja Ram Bishnoi ynnin i sngi da lai pait u ya ki kattu katni ki bynta yong ka chnong Mawlai wa kynthup ya ka Mawlai Kyntonmassar, Mawdatbaki wa Phudmuri. Ha i lai pait yong u DGP da yaklam leh wa ki kattu katni kiwa chong chnong kamjooh ki khynroo wa dang lai puræ.
U DGP da yachem u leh wa ki Waheh Chnong yong kitai ki chnong, wei da ap u leh yeiwa emkaam ki wa khamtam u pynyajan yei yatoh ki pulit wa ki paidbah, wei kamjooh yow tip wei tipmit bha yei thaw.
Hawa klam wa ki laad pathai khubor, u DGP Bishnoi da ong u wa ka chnong Mawlai toh ka chnong kawa chong suk chong saaiñ, tangwa da ong u wa kiwa chong chnong da pynsñiaw ki yei sñiawkhia hawa yatoh i roi i drugs.
Hawa kylli hajrong i dawa ka seiñ khynroo wow booh da ka Anti-Narcotic Task Force wa pura ha Mawlai, u DGP da ong u wa ym man iwa eh wow booh ya ka ANTF, deiwa pynrap wa iwa emkaam toh i ya krehlang hapyrdi ki pulit wa ki chnong yow pyndoohjait yei drugs na ki chnong ki thaw.
