Hadien wa maham u montri ka chnat puræ puthi ka jylla, u Lahkmen Rymbui ya kiwa sikai skur Samagra Shiksha Abhiyan (SSA) kiwa pynman yakhih hadooh ynne i miet ha i thaw pynyieñ kari ka Additional Secretariat, neiliang yong kiwa sikai da dawa noh ki ya u Lahkmen Rymbui wow paan maap u mynstep ka sngi, lym kamtæ waroh kiwa sikai u tympra noh ki ya ka Elementary Education ha ka jylla deiwa ieh kreh yonglang.
Ha ka yalang kiwa sikai wa em da ki spah ngut ynne i miet da kbai ki ya i kyntien wow dawa hiar chuki noh u Lahkmen Rymbui.
U president ka Meghalaya SSA School Association (MSSASA), u Aristotle Rymbai da ong u wa u Lahkmen da toh u paan maap u na waroh ki 12,541 ngut kiwa sikai SSA ha ka jylla.
Da ong u wa lada u Lahkmen maham u wow pyndooh ya ka Scheme cha ki Managing Committee yong ki skur SSA wa khang na ini i yakhih wei wow khate ya ka tulop yong kiwa sikai, da toh wow su chwa u ya ka tulop 5 bnai wa sah yong ki ha ka jylla.
Chooh chooh da ong u wa lada sñiawkhia u Lahkmen yei wym yoh tulop kiwa sikai, neiyi i daw wym yaklam u wa u Montri Rangbah uwa batai bait ya ka T. 44 klur wa da yoh na ka mang tangka yong u snem 2021-22, neibhah u Montri Rangbah toh u bru wa pait ya ka muna tangka (Finance) ka jylla.
