Ka sorkar jylla MDA da ong ko wa i kynrong ha i roi i paar wa i yoh i laa toh iwa kongsan tam neibynta ka jylla ym du ha i kreh wow pynku ya i rep i riang tangwa wot wow pynku ya ki karkhana khamtam kiwa yatoh wa i khayi pateiñ wa i yoh khih yoh kreh.
Da kdaw ko wa i kreh kam i siang psiang, ka bordiñ, i e wyrta da pynku i ya i yoh i laa ha ka pateiñ neibhah katkam ka sorjamin (Survey) wa da pynman ka World Bank, da chem wa i lap, i yohnong wa da yoh ki bru man i 1 naka 100 ha ka GDP da pynyabi wa i ku cha i 1 na ka naka 100 ha i pynlut ha ki kreh ha kiwa boon ka ri.
Ki bor synchaar ha Meghalaya sñiawthooh ki yeiwa da em wei yeiwa emkaam wow chna chooh sa kiwi yow pynku yei roi i paar liang wanang kam i chna ya ka yung dorbar chna aiñ wa da kreh nadooh u 2001 da sangeh i hadooh wa jan dap 20 snem heiwa kani ka sorkar da sdang kreh biang ko ya kani ka yung wot hapyrdi i pynthut ka kjut khlam COVID-19.
Man i leh iwa sarong ya ka Meghalaya ha ka ri katwa dang mutdur ya i mahajon ka riti dustur ka jylla ri-loom wei hajrong itæ da e yumut leh wow mang chooh sa T. 150 klur khnang wow pynbha ya ki yung krehkaam yong ki 10 tyll ki District heiwa ka sorkar da pdiang ko leh wow mang T. 1.20 klur neibynta wow pynchna ya ki yung krehkaam ki Block.
U Metbah Lyngdoh uwa man u lamphang ka yung dorbar chna aiñ da ong u wa i kreh ya ka yung wa thymme ha Mawdiangdiang da yah luti chwa da u (T) Donkupar Roy hadien wa wan ka sorkar Meghalaya Democratic Alliance (MDA) ha u snem 2018 heiwa i kreh da sdang i nadooh u Naiynru 2019, wei da lai i chaaid chaaid wei ymye won wow pyndep neidaw ka khlam COVID-19.
Heiyatoh wa ki khynroo khyllood wa thooh kreh da yarap ya ki deiwa em ka Shillong IT Park neibynta kiwa dadep puræ puthi kawa ye u pynmih 1,500 tylli ki kaam wei ye wow pynmih sa kamwa 3,000 tylli ki kreh.
Ye leh wow kdaw ya ka JN Complex wa ki Indoor Stadium, ka JN Sports Complex wa Outdoor Stadium, ka Wahiajer Multi-Sports Complex, ka Shillong International Centre for Performing Arts and Culture (SICPAC) man ki kajiak kam ka nongmuna.
Hajrong ini kani ka sorkar da kreh bha ko wow pynsmat yei kreh neibynta ki Hotel kam ka Vivanta Taj (Crowborough) Hotel wei da wai paidbah wa ka Courtyard ka Marriot ya kiwa da man ki ar tylli ki 5 Star Hotel ha Meghalaya iwa daw pynku ya ki kaam uiñke pyrthai.
Ka Meghalaya em ko leh ya ki thaw wa paka tam neibynta ka yaaw wa ki ri cha mihsngi ka Asia kam ka Bhutan, Bangladesh, Myanmar kiwa da embynta wa ka jylla heiyatoh wa i khayi pateiñ.
Chooh chooh ka Meghalaya man ko kawa mahajon ha ki mar pohkhyndaw wei em ko ki laad wow seiñ ya ki karkhana wa har rukom nei em kini ki mar.
Hajrong ini waroh da wanrah leh ya ka Meghalaya Industrial Policy wow pynsuk ya kiwa seiñ khih wei wow kyntu ya ka khayi pateiñ wow kiwi kiwi.
