theme-sticky-logo-alt
theme-logo-alt

Pynlait ka Santa Mary Shylla ya ka Ambulance ka Seng Samla Shnong Umkiang

Ka Santa Mary Shylla kawa naka chnong Byndihati, East Jaiñtia Hills District kam kawi naki kyrtong ka Party NPP ka wow yakhun yaka Election MLA 2023 naka 5-Sutnga Saipung Constituency, ha ka 14 tarik uni u bnai haka yalang pynlait paidbah yong yaka kari kit bru wa kjut namo ka Ambulance ka Seng Samla Shnong Umkiang wa da yoh lyngba ka Chief Minister’s Special Development Fund (CMSDF), na kiwa boon kiwa klam ha kani ka sngi da yaroh ki ya ka deiwa ong, hanla ym pu man ko kam ka MLA leh tangwa da embynta ko ha kiwa boon ki kam pynroi hapoh kani ka Constituency.

Hawa yaroh ya ki kaam yong ka, neiliang u Chairman ka JHADC, u Dr. Sankey Shangpung, u MDC u Emlangki Lamare, u MDC u Seiborlang Shadap, u Defender Pakem da ong ki wa ka da leh ko boon ki laad yarap neibynta ki paidbah deiwa lai yaklam wa u Montri Rangbah ka sorkar jylla, u Conrad K Sangma.

Ong haroh ki wa i yarap pynyoh Ambulance yong ka man ko ka bynta yong i roi i paar ymtoh i pynbiej Election, neibhah hawa ong pynbiej Election toh iwa khlam hi-eh khlem i kaam, katwa ka won pynyoo ko dei kaam.

Najrong ini da khana ki wa da yarap pynyoh ko leh yaka mang poisa chna yingkieñ lai kjat kawa T. 14 lak yaka chnong Lumphyllut wa haap hapoh ka thaiñ Narpuh.

U Kynjaimon Amse, Assistant Waheh Chnong ka Umkiang hawa pynsñiaw u yei lai luti yow yoh ya kani ka Ambulance da ong u wa toh dei yarap ka Santa Mary Shylla, wei kani ym mut u chakri du ya ki paidbah ka Umkiang tangwa ya kiwi won ki chnong wa emkaam yarap haka kjut chitom.

Hawa e yei klam, ka Santa Mary Shylla da e khublei ko ya u Montri Rangbah ka sorkar jylla wym jooh kyntait u yei yi waka da lai pynsñiaw ko neibynta i emkaam u paidbah wa wan ood cha ka ha kiwa boon rukom la neibynta u pynyoh Ambulance lane pynyoh ka mang poisa u chna yingkieñ lai kjat yow kaap chiliang yaka wah ha chnong Lumphyllut.

Sñiawngooh ko leh yaki khon khynroo ka thaaiñ Narpuh kam u Kynjaimon Amse, u Daiapherbha Lamare, u Raja Suchen wa kiwi kiwa da mih ki chakhmat u dawa yei hok ki paidbah ka thaaiñ, heiwa ka leh da yakrehlang ko chirup chirup wa kini ki khon khynroo ka thaaiñ.

Da ong ko wa kamwa ka thaaiñ Narpuh em ko 35 tylli ki chnong, kawi nei kyrkhu wa khroo tam wa da yoh naka sorkar NPP ha kani ka kynti toh ka Lumshnong C&RD Block kawa dang dep wai ini wa dep, wei kamjooh leh ka mang poisa wa T. 126 klur neibynta u chna ya u sarok wa 39 Km na Borghat hadooh Sonapur.

Kamtæ paan ko i kyrchaan naki paidbah u pynjop pura yaka ha kani ka kynti khnang yow ye chooh chooh ko u theh ki kaam pynroi ha kani ka thaaiñ wym jooh em wa bna waroh chi kattu.

Share this:
Previous

Khlaad ka Kong Lin Laloo

Next

Lai ka Meghalalya chakhmat wow chna ya ki thaw wow bnanaam