U Working President ka United Democratic Party (UDP), u Titosstarwell Chyne da ong u wa i pynkhreh ya ka Election MLA ha Sohïong da lai i chaphrang wei kamwa ka UDP Sohïong Circle da phah ko ya i pyrtuid u Synshar Lyngdoh, ka Election Committee yong ka Party daw chong ko myntu ka sngi wow chim ya i rai wa khaddooh wei hadien won daw pynbna paidbah.
Ya ka Election MLA ha Sohïong Constituency da hap pynsangeh noh na i khlaad syndet u kyrtong ka UDP uwa man leh u MLA warim katai ka Constituency, u Horju Donkupar Roy Lyngdoh uwa ki paidbah ka Constituency jooh khut maya kam u ‘Maheh’.
Hawa kylli, u Titos uwa man leh u President ka UDP East Khasi Hills, da ong u wa ympu nood wow ong iwon iwon hajrong i krehlang ka UDP wa ka sorkar MDA-2.0 lada daw ktah namo ym ktah ko ya ka Election ha Sohïong, tangwa da pynrap u wa chong ha ki paidbah yong ka Sohïong kamwa man ha ka yalap Election ha ki kajiak bnai wa dadep, ki paidbah da pynsñiaw ki yei kyrchaan ya u HDR Lyngdoh.
Chooh chooh hawa kylli, u heh ka UDP da ong u wa ka Vote sñiaw wyrai ye ko u em neibhah i maya ki paidbah ya u Maheh Don, tangwa da ong u leh wa chong hei ye yong u kyrtong kammon wow lai pynche cha ki paidbah.
