Lai kdup ka SWSRJ ya ki Dorbar Chnong ka Labang Nangphyllut Pangam Raliang Elaka

Ka Synjuk Waheh Shnong Ri Jaiñtia (SWSRJ) ha kani ka kynti da lai kdup ko ya waroh ki Dorbar Chnong yong ka Elaka Labang Nangphyllut Pangam Raliang, kawa man ka Elaka kawa da pynkhai im biang da ka JHADC heiwa da thung leh ya u Acting Dolloi yong ka Elaka wei ki Dorbar Chnong da yoh wow e Sanad ya ki da ka JHADC nadooh ka 29-08-24 kiwa da em kamwa 21 tylli ki chnong.

Ka SWSRJ kam ka seiñ kawa heh dooh ha Ri-loom Jaiñtia kawa dadep Register ha ka aiñ sorkar, toh ka synjuk ka wow pait ya i yap i im, i chitom saja ki dorbar chnong, ki waheh chnong wa kiwa chong chnong kiwa da tipmit da ka JHADC wei kiwa da yoh ya ka Sanad.

I thmu ka synjuk toh wow kyntu kynrong wow lait nei sahdien ki chnong khamtam kiwa em ha Ri-loom Jaiñtia wei kyrpang ya kiwa em hapoh ka Elaka kawa haap hapoh ka Block-I.

Chooh chooh deiwa leh kamni daw ye u kynjoh ktien cha ka sorkar Meghalaya kamjooh ki bor District wow e yarap cha kini ki chnong la hei dur i stat i tip ki thaw sumaar, ki sarok, ka um wa kiwi.

Related posts

I pynkynmoo ya kiwa lai Class-XI ha Kiang Nangbah Government Higher Secondary School

May 23, 2025

Yoh kem ka JNC Khliehriat Circle ya ar ngut kiwa pynemkaam drugs

May 23, 2025

Ka synjuk u kyrpaad joor ko na ka sorkar Meghalaya leh wow pynim wei wow tipmit ya ki khon ki rayot yong ka deiwa pynbait smat ya u pood u ang.

Ynnin ka sngi da em leh ka yalang ha Barato heiwa da pynlai ya ka da u Malbi Timung uwa man u Waheh Chnong na Ksehrynchang hei emlang u General Secretary ka Synjuk, u Kampher Pohlong wa kiwi kiwi.

Ki mat wa da yaklam toh wow pynbait noh ya ki kaam wa dang sah nadooh i pynbait ya ki thaw ki bhaw, wow wanrah ya ki kaam pynroi katkam wa toh hok u yoh ki paidbah ka thaaiñ.

Da yoh leh i klam na u President ka synjuk, u Army Lipon uwa da klam chiboon ki kaam kiwa yatoh wa ki thmu wa ki rukom krehkaam ka synjuk heiwa ka synjuk da booh ko leh kam kawi ka thong kawa hakhmat bha toh wow lai kyrpaad u pynsñiaw cha ka sorkar Meghalaya wow pynsmat noh u pynbait ya ki thaw ki bhaw, u pood u ang kiwa haap hapoh ka Elaka Labang Nangphyllut Pangam Raliang, kamjooh heiyatoh wa ki thaw yong ki Karbi kiwa haap hapoh ka Assam yow pynlang noh jar jiar, u yaklam wow wanrah yarap nadooh ki laad yada, ki luti ki syngkieñ, ki baam Rachon, ka Census Election Enrollment da ka sorkar Meghalaya, ki skur wa kiwi kiwi ki kaam pynroi ha kani ka Elaka wa emkaam u pyndap pynbiang.