I jop wa khlem poi pyrkhat u kyrtong ka Congress, u Saleng A Sangma na Tura uwa da knieh ya ka chuki MP nei kti kiwa ha-yung ha-sem u Purno A Sangma kiwa da ksoh ya ka nadooh u snem 1977 lait noh ha u snem 1989-1991, da pynphylla ko ya kiwa boon tangwa mar ya dep thap Vote i klam cha wah chaneiñ toh wa daw jop hi u.
Ini da man sakhiat i ynnin ka sngi heiwa da jop u deiwa yoh 3,83,919 Vote yow tam da 1,55,241 Vote ya ka kyrtong ka NPP, ka Agatha K Sangma kawa da yoh 2,28,678 Vote.
Hawa pait yei rukom yoh Vote u Saleng, da tam u ha 22 tylli ki Constituency na 24 tylli wei kini ki ar tylli toh ka Ampati waka Mahendraganj.
Iwa phylla chooh chooh toh wa ha ka South Tura Constituency kawa man leh kam ka Constituency u Montri Rangbah ka jylla, u Conrad Sangma, da tam u Saleng ya ki Vote heiwa da yoh u 12,245 Vote katwa ka Agatha Sangma da yoh ko 10,036 Vote.
Na North Tura Constituency kawa man ka Constituency u Thomas A Sangma uwa man leh kam u Speaker ka Meghalaya Assembly, u Saleng da yoh u 15,405 Vote katwa ka Agatha da ye ko wow yoh du 9196 Vote.
U Saleng uwa man leh kam u MLA ka Gambegre, hapoh ka Constituency yong oo da yoh u 18,318 Vote katwa ka Agatha won da yoh ko 5887 Vote donhi.
I kattu katni wa da lai pyrchah ya ka NPP toh hanla em ko boon ki MLA wa jop na Garo Hills, duna bha kiwa yoh u man Montri sorkar, neitæ i dam ka BJP wow pynyieñ kyrtong deiwa kyrchaan ya ka NPP leh da man kawi na ki daw bah neibhah ki paidbah ym em chaniah ki ya ka BJP wei ka lai yalap Election ha Garo leh da chim kabu ki yeini deiwa ong wa i thap Vote cha ka NPP toh i thap Vote cha u Modi.
Discussion about this post