Neidaw wym pu em kem ya kiwon kiwon kiwa emkti wow tynyap ya u Kyrshandame Talang uwa na ka chnong Mupliang iwa da jia nadooh ka 10 tarik u bnai wa dep heiwa yei metyap u iwa khlem sula da chem na kawi ka lyngkha ha i thaw wa tip kam i Moosdai iwa em ha khappood ka Mukhla Myrjai, ynne ka sngi neiliang kiwa chong chnong ka Mupliang wa Myrjai nadooh ki khynnah wa ki waheh da mih ki yow lai paidbah deiwa rah Placard rah Banner yow beiñ yeini.
Ha ka yalang paidbah da yoh i klam na u Waheh Chnong ka Mupliang, u Pyrkhat Sna uwa da ong wa kam ini wa jia ym ye wow pdiang ha chnong ha thaw wei da yoh leh yei klam na u President yong ka HNYF Thadlaskein Circle, u Esterwis Ryngkhlem uwa da ong leh wa kam ini i jia ha ka Bri U Ynñiawtrep ym ye u pdiang.
Kamjooh da e khubor wa che cha ka chnat pulit wa ileh wym ye u thooh ya kini kiwa tynyap bru wei lada jia ya ki dkhot seiñbhalang næ ya ki Dkhar ye ki wow thooh smat wei ileh won lada jia chah tynyap ki para snaam ym ye ki wow kem ya kiwon kiwon.
Uni uwa yahkhmat ka HNYF da beiñ joor u ya ka chnat pulit wei hajrong ini neiliang ka seiñ da phah ko ya ka khubor wa che wa lada chim ki yaka aiñ ha kti ymtoh u tuklar ki neibhah da ngiah u yang yaka aiñ sorkar.
Chooh chooh da ong u wa ka seiñ hi ym pdiang wei ym maap ko ya kam kini ki bru jrah snaam.
Neiliang ka seiñ waka Dorbar Chnong Mupliang da e khublei ki leh ya kiwi ki seiñ kiwa emlang ha nadooh ka KSU, HITO wa JSM.
Discussion about this post