Khliehriat: Ki dkhot yong ka East Jaiñtia National Council (EJNC) waka Hynniewtrep Youth Council (HYC) kiwa pyrchah yei pynman yaka Public Hearing yong ka Star Cement ha pchem ka yung krehkaam u DC ka Khliehriat, ynne ka sngi da pynman ki yaka lai paidbah (Rally) ha Khliehriat hadooh wa poi cha ka yung krehkaam u DC u E. Kharmalki deiwa rah ya iwa thoh yaki ktien pyrchah wa boon rukom deilang wa ki lama yong.
Neidaw wa hadooh kattæ u DC ym pu e u kawon kawon ka ka rai heiyatoh wow kyrriah ya i thaw pynman yaka Public Hearing, neidaw wa boon ki seiñbhalang napoh Jaiñtia Hills dadep ki wow e dei thoh cha u DC yow pyrchah yaka Public Hearing. Hadien kattu katni por u DC da wan u wow yaklam deiwa ong wa i pynman ya kani ka Public Hearing da phah ya oo nadooh ka sorkar bei, kamtæ da kular u leh hakhmat ki seiñ wow phah ya waroh iwa da e dei thoh yong waroh ki seiñ wa pyrchah cha ka Pollution Board ka jylla, khnang yow phah ko cha ka sorkar bei wow phah pyndam chwa ya katai ka Public Hearing.
Hadien ini, u Sambormi Lyngdoh hawa klam wa kiwa thoh khubor da ong u i pyrchah yong ki kam ka seiñ ya kani ka Public Hearing ka Star Cement kawa daw man ha kani ka 21 tarik toh hajrong ka yurim wa ym em lai ko katkam ka aiñ yong ka Environment Impact Assessment 2016 wa ym ye ki wow pynman yaka Public Hearing cha jngai na i thaw wa toh u pynman yaka Mining Project. Chooh chooh da ong u wa ini ym ye ko wow theh i roi i paar haki thaaiñ nongkyndong khamtam haki thaaiñ ka Brishyrnot, kamtæ ka Cement Plant thooh laad ko wow pynbiej ya kitai kiwa chong chnong deiwa kam wow wanrah yaka skur, Hospital wa kiwi kiwi du wow yoh u pynemkaam ya i thaw yong ki, da ong u leh cheiwon ka sorkar yong ka jylla yong i wa hadooh wa kitai kiwa chong chnong ka thaaiñ hap ki wow yang ya i roi i paar na katai ka Cement Plant, kamtæ ka seiñ ym e laad ko ya iwon iwon i thmu yong ki Cement Plant hapoh kani ka District, wei lada e laad yaki, khlem da artatien wa daw yoh ki wow thap leh yaki Vote yong ki hapoh kani ka District.
U R. Lamare uwa man u Secretary ka HYC- EJHD hawa e yei klam da beiñ joor u yaki Cement Plant khamtam yaka Star Cement deiwa ong wa ha kini ki kajiak bnai wa dadep, ka Star Cement da e yarap ko daki so-san lak cha kiwi ki jylla katwa hakani ka jylla yong i won ym em e ki iyi iyi leh khamtam ha kini ki por wa dadep neidaw ka khlam COVID-19 ka sorkar da pynman ko yei khang chnong wa hadooh wym yoh de ki bru wow lai mylla sngi, katwa kitai ki Cement Plant won ym em leh ki iyi iyi leh hajrong ini i kaam kamtæ da ong u kam ka seiñ ym e laad ko yaki ha iwon iwon i thmu yong ki wow leh ki hapoh kani ka District.
