15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Lai paidbah kiwa sikai Contract wow dawa pynneh ka sorkar yei kreh ki

Jowai: Kiwa sikai Contract hapoh ka lama yong ka Contractual Teachers Association All Jaiñtia Hills Unit, ynne ka sngi da ya mih madan ki deiwa lai Rally neibynta wow dawa yaka sorkar jylla u pynneh ko yaki hei kreh kam kiwa sikai, neibhah wa dang ini wa dep hei yachem yong ki wa u montri ka chnat puræ puthi sñiawthooh ki wa ka sorkar daw beh kreh ko yaki.

Yaka Rally da sdang na laad Kiang Nangbah Govt. College Jowai hadooh madan Jrisaleiñ, deiwa rah lang yaki Placard wa dawa pynneh yei kreh yong ki, kiwa ong wa i im yong ki chaniah i hei kreh i khih yong ki; sñiawbha ham pynyap noh ya i; i beh kreh toh i yooh beiñ yei hok manbru; i dooh noh yei khih i kreh man i jooh kamwa dooh yei mynsien. Kamtæ hajrong kani ka yurim ong ki wa daw yakhun ki yei hok la im ne yap.

Heiyatoh wa ini i yakhih, ka seiñ FKJGP Jaiñtia Hills e ko yei kyrchaan wa pura, wei neiliang u Vice President yong ka u Danny Shadap ong u wa smat ki wow yaklam waka sorkar jylla hajrong ka yurim wa lada ka sorkar pynkrehkaam ko katkam ka Resolution 2018-2019 yong ka MTET, wym toh won u krehkaam ko ya kiwa sikai kiwa da kreh nadooh u snem 2007, 2008. 

Ong u wa boon hi toh kiwa da kut i rta wow thooh kreh chawi, neibhah em kiwa da sikai la kamwa 10, 12, 15 snem, wei ini i thmu yong ka sorkar toh i yooh beiñ yei hok manbru.

Da ong u leh wa kam kiwa sikai kiwa da heh i rta, i jabieñ yong ki leh da len ko, wei ym toh de iwa suk yaki wow yakhun MTET wa ki khynroo khyllood wa dang biang i bor jabieñ.

Chooh chooh da pynrap u wa hei sakhiat ka sorkar toh u pyrkhat janai bha ko, u thooh ko ki laad ki luti deiwa e haki ka kynja sikai neibynta u kyntu yei yutip yong ki, lane u e laad biang yaki u yakhun MTET, wym toh wow beh.

Da yoh leh i klam naka Arbihlang Suchiang, Secretary Contractual Teachers Association All Jaiñtia Hills Unit wa kiwi.

Share this:
Previous

Dawa ka JWAM wow thooh hadooh wa yoh kem ya ki damok wa slaitbor wei pynyap bru

Next

Pynkup burom ka KSU Shangpung Unit daka Mait Shaphrang Academic Award ya kiwa leh bha ha ki Exam