Kam chibynta wow booddien ya ki kaam pynroi wa da pynkreh neibynta ki paidbah ka Sutnga-Saipung Constituency, neiliang ka MLA ka thaaiñ, ka Santa Mary Shylla, ynne da lai pait lai sylli ko ya waroh ki kreh kiwa hapoh ka thaaiñ Sumer wa hapoh ka Saipung C&RD Block dei thong wow sñiawthooh yei eh i khoo wow pyndep yei kreh kamjooh leh kammon da pynkreh.
Ha kani ka sngi da emlang leh u Deputy Commissioner ka East Jaiñtia Hills District, u Manish Kumar, u Block Development Officer ka Saipung C&RD Block, u Dr. R. Pyrtuh, u Executive Engineer ka PWD Roads, Khliehriat Division, u G. Langstang, u Engineer ka District Mineral Foundation Trust, u Dapmain Nongtdu, ka District Project Manager ka District Project Management Unit (MBMA), East Jaintia Hills District ka Pynhunlang War chirup wa kiwi de ki heh sorkar deilang kiwa yahkhmat chnong.
Neiliang ka MLA da lai pait ko yei pynchna ya u sarok Sutnga-Sumer, i pynchna ya ka yingkieñ hapoh ka Pradhan Mantri Gram Sadak Yojana (PMGSY) kawa pynyabi ya ka chnong Samasi, Moolait, Mookhain wa kiwi de.
Neiliang kiwa yahkhmat chnong da pynsñiaw ki yei wym sñiawhun yei rukom siang psiang ha ki kattu katni ki bynta wei yeiwa emkaam wow chna ki kynroh (Retaining Wall) ha ki bynta wa ye u oor khyndaw wei yei emkaam leh wow booh ki dooid ha ki thaw wa joor kai ka um heiwa neiliang ka MLA da phah ko ya ki Contractor wow pyndep yei kreh deiwa pliah katkam ki kyndon wa da booh.
Ka MLA da lai pait ko leh yei pynkreh yow chna ya ka yaaw Samasi wa da pynkreh hapoh ka Meghalaya Basin Development Agency (MBDA) hapoh ka MEGHLAMP deiwa embyntalang da ka North Eastern Council (NEC) heiwa ka MBDA da e ko Rs. 40.48 lak katwa ka NEC won da e ko Rs. 50 lak neibynta kani ka yaaw.
Da em ki bynta wa dadep kreh katwa em won kiwa dang sahteiñ, kamtæ da phah ya kiwa pynkreh yow pyndep smat yei kreh wei hapoh kani ka yaaw da em leh ka Collective Marketing Centre kawa man kam ka thaw wow booh wow pynlang ya ki mar rep.
Da lai leh cha ka Samasi wa Pala Health Sub-Centre yow pait yeiwa em ki Doctor wei biang ki dawai dachin wa kiwi de. Da lai pait leh ya Digital Library ha chnong Samasi kawa da chna lyngba ki yung krehkaam u Block Development Officer, Saipung C&RD Block deilang ka mandan Futsal Ground kawa da chna da ka poisa napoh ka District Mineral Foundation (DMF) Scheme.
Najrong kini waroh da lai pait leh yei pynchna ya ka yingkieñ Bri Manar wa em ha chnong Samasi wa ka Artificial Football Ground deilang ka Anganwadi Centre ha chnong Krem Myrsiang chirup i pynchna ya ka Jalaphet Government College.
Discussion about this post